Read pokoot AYUPU 5 Bible Online

AYUPU 5 - pokoot bible

AYUPU 5

¹“Kursyene köny, atesïwena lö, ekïmi chi nyo ngitönunyi? Malaykayan ne nyo irïpchinenyi tökungarakinyi?

²Tïghöy nörekyö sölwö akï pöröy nyonyintön pöngön.

³Kyasïwan sölwöy kuletöy tagh wölo kechïp kestonikwa panini.

⁴Memuköcha monekwa ntökïnyorï wölo tïghume akï möminye chi nyo ghyongchini chane ompö ka kirwok.

⁵Omöy pich cho sutyote paghechi, ompö chini mi wölo mi kato akwomchini pich maral sïkönötengwa.

⁶Melö pituno ngokï terït anta pituna kisusut ngwïny.

⁷Wölo ipchini kegh ptangengmöt kisusut, le koti ma cho piltoy yïm!

⁸“Wölo antökochan nyi, kötorirchinan Tororöt, kötopchinan Tororöt lokechu,

⁹nyo ighöy tïkwïn cho echön cho melö pköchini pich, akwighöy tïkwïn cho pö töngönchin cho makïrar.

¹⁰Nyinte nyo konu rop kïropönchï ngwïny, akuyoku rop ompö paren.

¹¹Nyinte nyo totegho pich cho ipöy kegh ngwïny, akïsyol chane cho riryot kïtïpï wölo tïghume.

¹²Nyinte nyo nyornyoröy tötut pö pich cho le lïsï atömepuntö tötut kökwa

¹³akïnama lïsatengwa pich cho lentöy kïchï ngöghomöch, akwighöy akupotyot lawel tötut pö chepölköstin.

¹⁴Ngwïnchini chane tuwïn pöghet akïsömsömotoy or pöghet kwen le oghö.

¹⁵Wölo söruno Tororöt pönon kutiwekwa, söru nyinte pich cho le chopan ompö mori pich cho owesöch.

¹⁶Kïlenyona tïng meyï kikönöt, kïsisyö nyu mwokïyis lasay.

¹⁷“Soyönote chi nyo töni Tororöt sitöt, kïlenyona mesas mungöto Kimuktoghin.

¹⁸Ompöwölo kotönöy nyinte, wölo rötöy moyokö Mungöy ewunyi, wölo sopöy nyinte.

¹⁹Sörunoninyi nyinte nyörilwok walaka nko walaka nyo metunyinye ghöyityö nyonikïny.

²⁰Ghetunoninyi meghat osiswo pekat akïsöruneninyi ngat ompö poryot.

²¹Söruneninyi nyinte kutïwa pich cho ghach, nyo mewöghisyö ato itï kiwurata.

²²Iroröchinenyi kiwurat nko kömöy amelö iwöghenyi tïpö wudïn.

²³Kilowitöy koghïn ompö paren cho ingorenyi aimöngenyi ompö kalya nko tïpö wudïn.

²⁴Atemanga nyu katangu ompö kalya iyitenyi kyakiku akï möminye nyo potöy.

²⁵Isïwïyenyi ngat lö chongitu moneku akïchangit yiyengu le sus.

²⁶Iwetenyi nyïngwïny otini keyositunyi nyoman le pagh cho kimïchï kekas.

²⁷Kikekïtöcha akenkïtï lö pö man ngalechï kö Ayupu tera akïpköchin ompö kinyiwutyengu kegh.”