Read pokoot AYUPU 7 Bible Online

AYUPU 7 - pokoot bible

AYUPU 7

¹“Tïngeto ptangengmöt ighisyö nyo aghïgh ompö ngwïny akïkarkegh osiswekwa nko mötworin nyo kighyongchini otini pöghisïyi,

²karkegh nko sekeyon nyo möro kong rurwö akïlata mötworin nyo köngöy ropïyenichi ketö.

³Ay, kakïtötwanïn aro cho puryö kinyiwut aketötwanïn nöngötus cho pö kitïmöt.

⁴Otini korïwön atepan kegh lö, ‘Yeköy oyï angetan?’ Ompöwölo kogh oghö Awöghökonan ompö pöröy kïyech.

⁵Kiyin nkut portanyan nko sïmnyon, tïdukisyot tïkwïn ompö portanyan atolapay kighya pïrutït.

⁶Töngoghöch osiswechan amotïngetanye kikönöt lö tosöpe ngat.

⁷“Inan, we Tororöt lö lenye söpontönyan yomöt pat, mökïsïwïyicha konyichan ngörekyö ngat.

⁸Sïwïyanïn chi ye, kite mökïsïwïyanïnye, lentöy orosanïn, wölo kyopotön lö weng,

⁹le polta nyo kïsïwïy akupot, lecha choni pich cho meghsot mökuyokunye kegh ngat.

¹⁰Mökuyodonye kegh kïpetöy amökunonönye chi nyinte ompö otini kimöngöy.

¹¹“Kïlenyona, melö osisan, ongölonan ongölonenan kisayateto mïkulöwunyu otontorönan ompö ngwonïnto söpontönyan.

¹²Ayo ochan so nanam anta tyompö nanam, tetönönyi pich kiripanïn?

¹³Kïkany olan orï tomuny, atömanyïl ana kwasta kite ngwonïntönyan,

¹⁴wölo kighaninyi omïgh ompö kirwotïtogh aiyotyeghenaninyi ompö rïwöntenyan,

¹⁵ntolan ngwangwa keghïghïnyanïn karam meghat kïtïl onyorwan nyörilwok cho tenö chi.

¹⁶Köghöchanïn söpon nyo le nyinyan amelö kosöpan tagh kokay. Opïstanïn ompöwölo töngoghöch osiswechan, karkegh nko yomöt pat.

¹⁷“Ne ptangengmöt nteyanganyi, akï pö ne tenana nyinte?

¹⁸Irimrimenyi nyinte tökwoghö anka tïkwïl ityömenyi nyinte ompö pöroyïn anka tïkwïl.

¹⁹Inömonaninyi kong nko oyï nya, mepïswo ompö anyïkwïda nyo le ngwïlyan?

²⁰Kïkany ato aghan ngokï, kïnyorunyi ne nya ripinto ptangengmöt? Kalïkwï ne tökïkeranïn sitengu? Ayo, kalïkwan nïkisïn ompö nyi?

²¹Ompö ne tömelöstowaninyi ngokichan, aingöngöghta ghöyityenyan? Ompöwölo tomönye kite ketïpanïn, iyöraninyi wölo menyorwanïnyinye.”