Read pokoot AYUPU 9 Bible Online

AYUPU 9 - pokoot bible

AYUPU 9

¹Atolapay kuyokyï Ayupu lö,

²“Onkïtön nyoman lö lecha choni, wölo mukoy lö ne kelö tenate ptangengmöt ompö tawu Tororöt?

³Muköy chi lö ne kumölöy kegh nko nyinte? Muköy chi ntökïtep nyinte teput elpu akonga ameyokunye.

⁴Ngöghom Tororöt akwawes, ngo chi nyo kikumöl kegh tïkwïl ntökumï?

⁵Notegho nyinte kutïngkot kïpuryö kunkïtï kutïngkotï akïwaghach chane ompö nörekyenyi.

⁶Timtimöy nyinte ngwïny kunaka otini kömi ighöy pchörinechi kïpotonchö.

⁷Mwochini nyinte asis melïwï akïkarta kokel tömelïwï.

⁸Nyinte kegh nyo kikarkar yïmwöy akïtyakata mirtino nanam.

⁹Nyinte nyo kigh kokel. Kigh Sta nko Kakoretaran nko Kaghis nko Ara Tipïn.

¹⁰Nyinte nyo ighöy tïkwïn cho echön cho möpköchininye pich ighöy tïkwïn cho pö töngönchin cho möminye söröm.

¹¹“Weranïn pat amosïwïyanye nyinte poyotoy nko ani wölo melö osïwïyan.

¹²Chengöy Tororöt kïgh, ekïngo nyo miröy nyinte? Akï ngo nyo muköy kïtepo nyinte lö, ‘Ne nyï ighenyi?’

¹³“Meyodonye Tororöt nörekyenyi. Kitïkatïk nyinte kingöroki Raap.

¹⁴Omölyöngnchinan lö ne Tororöt? Onyorchinan onö ngal tomölyöngchï nyinte?

¹⁵Kïrkegh kömotïngetanye lelut kïmoyokyinanye ngölyon olokyinan Tororöt nyo le mutinto ngal kisyonchanïn.

¹⁶Ato akïcham okurön nyinte lö nyonö kokwö kötö melö oghönan lö terwanïn ngalechu.

¹⁷Ompöwölo ryöpenanïn nyinte chepkïrïri akïtas moyoköchan, kïrkegh mochan ighat kïgh.

¹⁸Möpïswanïnye ompö omuny wölo nyïghitanïn ngwonïn.

¹⁹Ato kïpegha owesyö, kï nyinte nyo pölisïyi kïkany kepegha man, kï ngo nyo muköy kïkuru nyinte?

²⁰Kïrkegh kömotïngetanye lelut, kurwokyinanïn ngalechu kegh. Kïrkegh kömotïngetanye kigheghchin, kïsöwintönchinanïn nyinte lö ochan chumpönote.

²¹Motïngetanye lelut, wölo moyonganye kegh, kitödöghchanïn söpon.

²²Karkegh ngalechoni löwïr, kïlenyona omwoghan lö, wongöy Tororöt pich cho karamach nko mwokïyis.

²³Ato chïnï kïgh nyo mutöy chi puryö lelut lö tïch, roröchini nyinte chichoni kewongwï kwïle.

²⁴Kitö Tororöt mwokïyis ngwïny, akumolul kirwokikwa kïköryö. Kïkany ato melö nyinte nyoni, kï ngo nyu nyo kitö?

²⁵“Pïrtïte osiswechan kïtïl kirïpin weröy amelö mi kïgh nyo karam nyo nyiwu.

²⁶Weröy söpontönyan le meli nyo kwïskwïs le sich nyo chororchini plekwa.

²⁷Ato olan, ‘Nyowutyeghan ngwïrngwïrönötenyu apuktö tokochu sïngiryö aturön,’

²⁸wölo owöghan kiwongutköchan lakaw, ompöwölo onkïtön lö nkït Tororöt lö kyalelan.

²⁹Kïkany ato ochan lelin, kïpö ne nyu asïngan kwïle?

³⁰Kïrkegh amwatan kegh pögh cho rotöy awunö morichu sapunion.

³¹Wirchinanïn nyinte pïrïm wölo mi sïmnyon töghanïn ompö chini le sïroköchan.

³²Ntö kö ptangengmöt Tororöt, kötomölyöngchinan, akepa kokwö kerwok nko nyinte.

³³Wölo puryö ghetin nyo ghyongo kwenuncha nyo kötö pesyonecha.

³⁴Nya kunategha sitenyi ompö wölo omitan, tömöwirenanïn otyoghtanyi mïghö!

³⁵Atamukan nyu angalan kïpuryö nyökoryö, ompöwölo onkïtön kegh ante.”