Read pokoot TUMWÖY 102 Bible Online

TUMWÖY 102 - pokoot bible

TUMWÖY 102

¹Iterwante saghatenyu, we ECHOTYON, nya kwitï riratenyan wölo imitenyi.

²Melowitï nko ani ato itwanïn nyarïl! Ikap yitïngu ompö ani, aimölyöngwï lawel otini kokursyan.

³Weröy osiswechan le ighöt akïnöghöy portönyan le lyopöt.

⁴Kakïtyakanïn le sus cho kikïyomö. Melö totïngetan machat nyo pö omisyö.

⁵Oteghan otini osönönan, ko kwïle portönyan.

⁶Kakaran kegh nko tarit nyo mi surkwen, akarkegh nko pyukïk nyo mi siriron.

⁷Melö tökwomanïn rïwöntö, alatan tarit nyo mi onkït kö parak.

⁸Ngemanïn pungköchan kwimön, chïpisyegho chane kaynatenyan otini nyernyerenanïn.

⁹Kyaman aren le omisyö kötuyö lokechan nko pögh cho ogheghan

¹⁰akwompö nörekyengu nko sïngiryengu. Kenamaninyi aiwirchanïn wölo low.

¹¹Karkegh söpontönyan nko rurwo mönon, kosilönön le sus.

¹²Wölo ichinyi pöytoghin kokay, we ECHOTYON irumtonyi pïnwöy löwïr.

¹³Syonchinö kanasyanta Sayon,* kakwitïta ato kömïchï kelul, asista nyete nyo mïchini.

¹⁴Chömöy mötworiku koghichi, kïrkegh kökikenyar kïlïkwï kïratyan.

¹⁵Atökuwagh nyu puntonï kaynata ECHOTYON akuwagh pöytoghï löwïr ororyenyi.

¹⁶Kïsïwïyi wölo töror ECHOTYON kïlïkwï, otini katek Sayon ngat.

¹⁷Lïmöy nyinte sowut mey amelö sösöy saghatengwa.

¹⁸Nya kekirchï ngölyontonï pïnwöy cho pkonöy, atökumï pich cho tökeyiyöy kïsal ECHOTYON.

¹⁹Kitopönunö ECHOTYON korenyi parak wölo tïlil, akuros ngwïny ompö yïm.

²⁰Atökïlïm kiwongunöto pich cho rötote, akutyak chane cho kökikerwokyï meghat.

²¹Kïmwotïtegho nyu kaynata ECHOTYON Sayon akesal nyinte ompö Yerusalem,

²²otini kötuyö puntonï nko pöytoghï löwïr, atökïsagh ECHOTYON.

²³Kechïchuk nyinte owesyenyan kïtochan mïnïng akïnïk osiswechan.

²⁴Olan, “We ECHOTYON, mecheng söpontönyan otï le ye, otï tochan chumwak. Ichinyi satate kokay, we ECHOTYON.”

²⁵Kighanyi ngwïny otini le könyisyok, aighenyi ewuneku yïmwöy.

²⁶Weröy choni, wölo ingötunyi, wïryot chane le sïro aiwirtonenyi chane le sïrochoni akupotyö chane lö weng.

²⁷Wölo imitenyi lenyoni kokay, melö tïng könyisweku söröm.

²⁸Tïpisot monïngo mötworiku ompö kalya akïtïpisot pikökwa, wölo tïghume kïnomnyö ompö tawungu.