Read pokoot TUMWÖY 143 Bible Online

TUMWÖY 143 - pokoot bible

TUMWÖY 143

¹Terwante saghatenyu, we ECHOTYON! Ilïm riratenyan ompö otöptöngu nyo ghanate, aiwöghökwante ompö mantangu.

² Merwokyï mötworintengu, ompöwölo möminye chi nyo pö man ompö tawungu.

³Mito punyontenyan kïpïrpïranïn akakïpïrchanïn ngwïny, keghanïn otöpan wölo tuw le pich cho kipa ngwen könyisyok.

⁴Kameghanïn ye nyu mu, körömpïsanïn mïkulögh ompö kiwaghat.

⁵Ononan osiswo könyisyok, mi kinonutköchan tïkwïn cho kighanyi ononan ighisyewutko ewuneku.

⁶Osyolan ewunechu parak ompö saghat amate maral söpontönyan ompö nyi le kor nyo tïyame.

⁷Wöghökwante nyete le ye, we ECHOTYON! Melö totïngetan kikönöt ngat. Mewïngenanïn kegh atömökituyanïn nko pich cho kïrorchini ngwen.

⁸Nonwante chomnyengu nyo pö kokay tökwoghö anka tïkwïl, ompöwölo otwoyteninyi kegh. Itu sowutköchan wölini imitenyi, porwante or nyo mïchini arïpan.

⁹Sörwante achïwïta punkachu, we ECHOTYON, orïpchinan wölo imitenyi.

¹⁰Netante arïp machatengu, ompöwölo ichinyi Tororötïnyan! Nya kuntöghoghwanïn mïkulöwungu arïpan or nyo karam.

¹¹Sörwante, we ECHOTYON, akwompö töroryeto kaynatengu. Ngwïsunenante nyörilwoköchan ompö mantangu.

¹²Ompö chomnyengu nyo pö kokay, pörwante punkachu ainyar pich löwïr cho le pïrï, ompöwölo ochan mötworintengu. Tum pö Daudi.