Read pokoot TUMWÖY 147 Bible Online

TUMWÖY 147 - pokoot bible

TUMWÖY 147

¹Asala ECHOTYON! Karam ketumchï sölut Tororötïncha, mïchinote akïpïchigh kesal nyinte.

²Teköy ECHOTYON Yerusalem ngat, yoku pipö Israel cho le pïnot.

³Sopöy pich cho kimeghö mutïnö akïrat moyokökwa.

⁴Nkït nyinte chongïn pö kokel akutöni löwïr kaynötutkökwa.

⁵Wow ECHOTYONtencha akwawes, mötïngnye ngöghomnyenyi söröm.

⁶Syolöy ECHOTYON pich cho kïpïröy, wölo wirchini mwokïyis ngwïny.

⁷Otumchinö ECHOTYON ayokyï sörö, opïtö pïkan nyo sölöy Tororötïncha.

⁸Yeno nyinte poltoy wölnö le mïröt akutö rop ngwïny akwigh sus kïpita komos.

⁹Töni tyonkïn omisyö akïpagh wara kukayoy ato riryö.

¹⁰Melö ngörokinyi owesyo angole anta turön ompö kelyo ptangengmöt,

¹¹wölo ngörokyini pich cho konyïtöy nyinte, chane cho könöy chomnyenyi pö kokay.

¹²Sala ECHOTYON, we Yerusalem! Sala Tororötïngu, we Sayon!*

¹³Kechïchim möröw cho pö kukengu atökusoyönisyö piköku cho mi ori.

¹⁴Töni pöghisyö rotyotïneku akupïghyonginyi ompö nkanun cho karamach.

¹⁵Yontoy kirurutyenyi ngwïny, kelöy ngölyontenyi lawel.

¹⁶Ghïtoy pïnwöy le menyon akutoytoyö röyön le aryon.

¹⁷Ropönu takarïs le ngoryöw. Ngo nyu nyo muköy kughyongo kaghïtantanyi?

¹⁸Atolapay kuyoktö ngölyontenyi kunyit takarïs, kutïtoy yomenyi kuyintoy pögh.

¹⁹Porchini Yakopo ngölyontenyi, kutö pipö Israel kikirutkachi nko kirurutkachi.

²⁰Wölo melö kighchï punton lenyoni, melö nkït chane kirurutkachi. Asala ECHOTYON!