Read pokoot TUMWÖY 22 Bible Online

TUMWÖY 22 - pokoot bible

TUMWÖY 22

¹Tororötïnyu, Tororötïnyu, ompö ne tepïstaninyi? Ompö ne telowitunönyi ompö ani ameteröy riratenyan?

²Kokurinyi ato le pöghet, we Tororötïnyu, wölo melö keyokunyi, olan okurinyi oghö, wölo monyorwanye kimïny.

³Ichinyi Tïlil onkït, itöponyi ngacharungu, salata pipö Israel.

⁴Kitwaytinyi kegh papotïnecha, kitwaytinyi kegh aisörunyi chane.

⁵Kirirchinyi chane akesörï. Kighaninyi amelö kinyorï arasï.

⁶Wölo melö tochan ye nyu chi, ochan möchon nyo roröchini pich akïsösöy.

⁷Ngemanïn pich löwïr cho sïwïyanïn akunkölchinanïn, akupirpiröy mötöwekwa.

⁸ Kïlentöy, “Kikönenyi ECHOTYON, kunkö ye mösörunyi? Ato chöminyi ECHOTYON, kwompö ne tömengarakanyi?”

⁹Nyi nyo kighanïn angwïna muyeto yonyu. Otini kitö orerïyan ikamananinyi lasiny.

¹⁰Kyatwaytan kegh nyi kïngata otini kikïyiyanïn, kichinyi Tororötïnyan kïngeta kïyiyanïn yonyan.

¹¹Melowitï ompö ani, ompöwölo kilekïtit kömpölelyö akï puryö chi nyo konu kingarakat.

¹²Chang pung cho kerikanïn le kir, kewitanïn kiru Pasyan cho köromöch.

¹³Ngongchinanïn kutïwekwa le ngötïny nyo mororöy akïtïlöy.

¹⁴Alatan pögh cho kakïmïlchï ngwïny, köchuniö koyechan löwïr, kakarkegh mïkulöwunyan nko tömönchö nyo keyinta.

¹⁵Kikïyam owesyenyan le pakasyon akïsisyö ngalyapunyan kutinyan parak. Kepïsyaninyi kuti pïrïm.

¹⁶Kewitanïn söpïchis pö mwokïyis, kukïdinechoni kerikanïn. Pokpoköy chane morichan nko kelyechan.

¹⁷Omukan oyitöy koyecha löwïr, rosanïn pungköchan akuchirchanïn konyïn.

¹⁸Omo pkiryot sïroköchan akuporchï kegh achane.

¹⁹Melowitï nyo le nyi, we ECHOTYON, nyonö lawel, we kingörokutyenyu.

²⁰Sörwante achïwïta chok, ighet söpontönyan ompö kukïdinechï.

²¹Isörunenante kutïwa ngötuny aighetante achïwïta kuyo soghen.

²²Omwochinan piköchan tïkwïn cho keghanyi, osöleninyi tawu tuyengwa.

²³Asala nyinte cho okonyïtöy ECHOTYON, okwolö nyinte monïngo Yakopo! Asagha nyinte akwa pipö Israel!

²⁴Melö sösöy nyinte mey anta tagh kusyonchï ompö kiwongunötengwa, melö pörtoy wölona ompö chane, wölo ngöroköy ato rirchï nyinte.

²⁵Nyi nyo mïchini salatenyan ompö tuyot nyo mamïnïng. Oropteghonan amörostinechan cho koyomisön tawu pich cho konyïtinyi.

²⁶Omisïyi meyï akïpïghyö lasiny, pich cho pkonchini ECHOTYON kïsölöy nyinte. Nya kïnyorï chane perur kokay.

²⁷Nonöy puntonï löwïr ECHOTYON akïparta wölo mi nyinte, soghöy nyinte pipö ngwïny löwïr.

²⁸Ompöwölo pö ECHOTYON paytagh, pöytoy nyinte punton.

²⁹Ngïrukyini menoti ngwïny nyinte, akïkïtïngchï chane cho wonyot, cho memukönye kwigh kegh kïsöpchö.

³⁰Pöghisyechini nyinte pïnwöy cho tökeyiyöy, mwochini pich pïnwöy cho tökïpkonöy lökoyo ECHOTYON.

³¹Kïmwochini pich cho tökeyiyöy lö, “Kisörï ECHOTYON pikachi.” Tum pö Daudi.