Read pokoot TUMWÖY 31 Bible Online

TUMWÖY 31 - pokoot bible

TUMWÖY 31

¹Oghïpeninyi, we ECHOTYON, mekany onyorwan arasï. Sörwante ompö mantangu!

²Terwante! Sörwante nyete le ye! Lïkuna köpönenyan nyo oghïponan nko wölo tïghume.

³Ichinyi köpönenyan nko wölo tïghume, ntöghoghwante airipante ompö töroryeto kaynatengu.

⁴Ikany achïwïtan ngöghöp nyo köwïnchï chane arenyan, ichinyi wölo mi oghïponan.

⁵Otöninan söpontanyu moriku, sörwante, we ECHOTYON, Tororöt pö man.

⁶Oreyan pich cho soghöy tororötino putintön, wölo otwoytonan kegh nyi, we Tororötïnyu.

⁷Ongörökan aturön ompö chomnyengu nyo pö kokay. Isïwïyenyi nyarïltanyan ainkïtönyi kömpölelyenyan.

⁸Melö ketönaninyi mori pungköchan, wölo kekonaninyi kitakat.

⁹Isyonchante, we ECHOTYON, ompöwölo omitan nyarïl. Kewonyeghö owesyö konyichan ompö lok nko portönyan nko söpontö tïkwïl.

¹⁰Kaghach söpontönyan ompö nyarïl, kosönönön könyiswechan löwïr. Kapotanan akuwonyeghenanïn owesyö ompö kichoputköchan[4] köyositu koyechan tïkwïl.

¹¹Kanyernyerenanïn pungköchan löwïr, ntökïmïr tya pörörisköchan. Nyini kasïwanïn kongotichan, kwotyö, ato söchanïn arawet kupertoy.

¹²Melö tökunonanïn chi anka tïkwïl. Alatan chi nyo kima ompö chane. Alatan kïgh nyo kikewirchï ka sïkon.

¹³Otini kalïman pungköchan kï chomanïn asïwan lö, kiwitanïn tapan. Mi kïtötöy kïwökanïn. Mököy chane kïparanïn.

¹⁴Wölo otwoytonan kegh nyi, we ECHOTYON, ichinyi Tororötïnyan.

¹⁵Mi söpontönyan moriku, isörwante achïwïta punkachu, achïwïta pich cho chopanïn kong.

¹⁶Itopönante mötworintenyu ompö köromnyö, isörwante ompö chomnyengu pö kokay.

¹⁷Osoghinyi, we ECHOTYON, lö, mepïstante onyorï arasï, wölo ikany kïnyorï mwokïyis arasï, ikany kïpa chane opïn kïröytö ngwen.

¹⁸Ikar kutïwa pö pïchoni le putï, pïchoni menöy akïkwolöy kegh, pich cho sösöy pipö man.

¹⁹Wow tya köromnyengu ompö chane cho konyïtinyi nko chane cho ghïponinyi! Kïsöwintönchini pich löwïr.

²⁰Iwïnchinenyi chane ato tïghume ompö möngengu, ato lowö tötut wökï. Ripote chane ompö kongu, ato lowö semsem.

²¹Nya kïsala ECHOTYON! Keporwanïn chomnyenyi nyo pö kokay ompö töngönchin, otini kyomitan kanasyanta nyo kirik pung.

²²Kyowöghisyan anonchan kegh lö, “Manan kilowit nyinte ompö ani.” Wölo ilïmanyi nyinte riratenyan, otini kyarirunyi omököy kingörokut.

²³Achama ECHOTYON, akwa löwïr cho ochï pikachi. Körtoy ECHOTYON kighönï, kïpoto pich cho kwolöy kegh cho töni sitöt nyo mïchini.

²⁴Okilö kegh anyökönitu, akwa löwïr cho otwoyto kegh ECHOTYON. Tum pö Daudi.