Read pokoot TUMWÖY 38 Bible Online

TUMWÖY 38 - pokoot bible

TUMWÖY 38

¹Mesyölchante, we ECHOTYON, ompö nörekyengu amechopante kong ompö kililatengu!

²Kerïnganïn kotiku cho kewutïnyi, kerapakanïn ewungu awiran ngwïny.

³Otïngetan ngwonïn nyo wow ompö nörekyengu. Kasate portönyan kïmïkul akwompö ngokichan.

⁴Ketunganïn ngokichan, nïkisïn nyo momukanye osïtöy.

⁵Könïnö moyoköchan akïngutö, akwompö sölwontönenyan.

⁶Kakighanïn ongïrukö amelmelön ngwïny, omitan orirotoy kwimön.

⁷Kelayanïn por lö chwat, otïngetan ngwonïn nyo wow.

⁸Ochan nyarkalal akikeraprapanïn, osönönan ompö nyarïl nyo mi mïkulöwunyan.

⁹Inkïtönyi möchutköchan löwïr, we Echotyon, amelö wïngate riratenyan ompö nyi.

¹⁰Wiranïn kisön mïkulögh amotïngetanye owesyö, kikulömomisyö konyichan.

¹¹Melö tökïrikanïn kongotichan nko pörörisköchan akwompö moyoköchan kelowit kegh nko ani ompö chini le tïlyayichan.

¹²Tekwanïn ngöghöp chane cho mököy kïpöranïn. Ngölonenanïn nyo gha pich cho mököy kïpöranïn, möminye ato sisyot menan wölo wöktenanïn.

¹³Alatan chi nyo mingate nyo mölïmönye kïgh alatan kïmang nyo melö ngölonöy.

¹⁴Kakaran kegh nko kïminy, chi nyo memukönye kïsöröpchini kegh.

¹⁵Wölo otwoytoninyi kegh, we ECHOTYON, iwöghökwaninyi, we Echotyon Tororötïnyu.

¹⁶Mekany kïroröchanïn pungköchan cho kwolöy kegh ato achitan.

¹⁷Karich apïtan akïmi kichiratenyan nko ani kokay.

¹⁸Kokötan lelutköchan, kotyechan ngokichan.

¹⁹Söpchot pungköchan akïtïng owesyö, chang tya cho ghöchinanïn kwïle.

²⁰Reyanïn pich cho oghchinan nyo karam, ompöwölo omukyinan oghöy cho tenote.

²¹Mepakachtante, we ECHOTYON, melowitï ompö ani, we Tororötïnyu!

²²Ngarakante ye, we Echotyon, nyo isörwanïn! Ompö kintöghoghinto tumï Yedutun. Tum pö Daudi.