Read pokoot TUMWÖY 39 Bible Online

TUMWÖY 39 - pokoot bible

TUMWÖY 39

¹Kyamwaghan lö, “Oripan ortïnechu atömotöp ntagh ngokï ompö ngalanatenyu. Onöpan kutinyu, ato lekïtenanïn mwokïyis.”

²Kyotöpan, asis lasay, mangalananye nyonikïny, wölo kïrkegh kïlenyoni, kïtasa nyarïltanyan kïyetï.

³Owongwan tya ompö mïkulöwunyan. Otini kyononsyan, kitasa kiwongunötenyan tya. Atolapay amwaghan lö,

⁴“Porwante sörömuto söpontanyu, we ECHOTYON, nko chongïnto osiswechu, porwante wölini töngoghöch osiswechoni kïlïkwï.”

⁵Wechï kekonaninyi söpon nyo tangogh! Melö kïgh söpontönyan ompö tawungu. Karkegh ptangengmöt nko kimïny.

⁶Weröy chi anka tïkwïl le rurwö. Pöyitu kwïle sïngutkachi löwïr, ghömïtöy nyinte tïkwïn, wölo menkïtnye lö pöyitu ngo.

⁷Otwoytonan kegh ne ye nyu, nya Echotyon? Mito kikönötenyan wölo imitenyi.

⁸Isörwante ompö ngokichu löwïr amepïsyï sölwöy kïröröchanïn.

⁹Ochan kïmang, mongölonanye, ompöwölo nyi nyo kegh le nyete.

¹⁰Mechopante kong ngat, karich kuwanyanïn mungötengu.

¹¹Imungenyi ptangengmöt aitö sitöt ompö ngokikwa aiwany sïkönötengwa le rirïm. Karkegh ptangengmöt nko kimïny pat!

¹²Lïmwante saghatenyu, we ECHOTYON, aiter riratenyan, mesis ompö lokechan, ompöwölo alatan tontengu nyo weröy, ochan rutoghin le papotïnecha löwïr.

¹³Pïstante onkït, atonyorï ngörekyö kite, kïtomö oweghan ngwïny, awö kokay. Ompö kintöghoghinto tumï. Tum pö Daudi.