Read pokoot TUMWÖY 49 Bible Online

TUMWÖY 49 - pokoot bible

TUMWÖY 49

¹Atera ngölyontonï akwa puntonï löwïr! Akapa yit pipö ngwïny kïmïkul,

²lapay cho echön nko cho mïnkech, sïkön nko mey tïkwïl.

³Ngölonu ngalyapunyan ngöghomnyö akï pö sïkunöt kinonutko mïkulöwunyan.

⁴Oköpan yit talïm ngötïnyö, atowöghökwan ompö pïkantinyan.

⁵Monyökoritunanye osiwo kömpölelyö, otini kerikanïn lïsï,

⁶cho ghach cho tigho möt sïkönöt akïmenö tïkwïn cho chang cho tïng.

⁷Möminye ptangengmöt nyo muköy kutyoköy kegh, memukönye kwala Tororöt söpontanyi,

⁸ompöwölo wow tya olyo söpon, memukönye sïkönötenyi,

⁹kwigh nyinte kïsöp kokay, amasïwa ngwen.

¹⁰Nkït chi anka tïkwïl lö, meghsot cho ngöghomöch akuwonyot tïkwïl sölwöy. Pïsyini pikö walaka sïkönötengwa.

¹¹Lïku pïrïmpotikwa möngengwa kokay, lïku möngeto pïnwöyikwa kokay nko kokay, kïrkegh kökikukirchï kegh parenikwa.

¹²Mösörunye chi ororyenyi, meghöy pat le tyony.

¹³Anyï kïgh nyo igho ompö pich cho ghönöy kegh. Anyï sörömu pich cho tigho kegh sïkönötengwa.

¹⁴Petöy chane ngwen le kechir akïlïku meghat mösöwontengwa. Lïku ngwen möngengwa akïnïnyeghö porwöyikwa wöloni. Wölo ngetöy chane cho kimöngisyö ompö man, otini kiyech!

¹⁵Olöy Tororöt söpontönyan akïsörunenanïn owesyö ngwen.

¹⁶Mesus kegh ato isïwa chi kïsïkönon anta tösisyö tïkuchi kïchangit tya.

¹⁷Mepönye nyo le ompö akonga otini karapas nyinte amelö kïtïpöy nko tïkuchi.

¹⁸Kïrkegh kölentöy chi okwolo kegh söpon pö ngwïnyinï akekwol nyinte ompö tïkwïn cho chang cho kegh,

¹⁹wetöy nyinte ngwen, wölo melö tökesïwïyi löpoyïn!

²⁰Mösörunye chi ororyenyi, meghöy pat le tyony. Tum pö Asap.