Read pokoot TUMWÖY 50 Bible Online

TUMWÖY 50 - pokoot bible

TUMWÖY 50

¹Ngölonöy Tororöt nyo wow tya, mwochini ECHOTYON ngwïny kïngata kongasis ntökwit okumpö ta.

²Lïwuno Tororöt Sayon,* kanasyan nyo pïchigh tya.

³Ngwïnöy Tororötïncha amelö sisonu, mi lyopötö nyo ngwan tawunyi, chepkïrïri nyo wow nyo kiwit nyinte.

⁴Kuröy nyinte yïm nko ngwïny atökïsöwintönchï, otini rwokyini nyinte pikachi.

⁵Lentöy, “Aghamïtwanïn pikachu cho ghönote cho kyam muma* nko ani ompö amörostin!”

⁶Mwotïtoy yïmwöy manpa Tororöt akuparta lö nyinte nyo le mutinto ngal.

⁷“Atera pikachu ato ongölonan. Omwoghan lelutköku Israel, ochan Tororöt, Tororötïngu!

⁸Melö ogheghchini ompö amörostineku anta amörostineku cho kïpelöy cho ikonaninyi kïtenö osis.

⁹Motïngetanye machat nyo pö eghineku anta kwoghe cho mi kyakiku,

¹⁰tyonkïn löwïr cho mi wudïn kï chichan nko tïch cho mi komos cho makïrar.

¹¹Chichan töritwö löwïr cho mi yïm nko tyonkïn löwïr cho mi wuw.

¹²“Ntökochan sutate, melö komwowunyi, ompöwölo nyinyan ngwïnya nko löwïr cho mi orinyi.

¹³Ilentenyi so oman panya eghin anta olï kisön pö ngaror?

¹⁴Nya kïlïkwï sörö amörostineku ompö Tororöt aitö kiwolwolutköku nyinte nyo Töror Tya.

¹⁵Kuranïn osiswo kömpölelyö atosörun atekusanïn.”

¹⁶Wölo lenchini Tororöt mwokïyon, “Itïngenyi ne kirurutköchan anta ingalana mumenyan?

¹⁷Ketaghanyi anetinyi aipïstö ngalechan.

¹⁸Otini ketuyenyi nko chorï iwenyi tïkwïl ainomnyotö nko cheporestin.

¹⁹Kepïsyinyi kutingu kïngalan ngal cho ghach, kunkït ngalyapungu kïkwïröy putintön.

²⁰Ingölononyi nyo gha werïnkwa aiyar lelut ompö werto komöt.

²¹Kighanyi ngalechoni löwïr, wölo kyosisyan kegh. Ilentenyi so oköran kegh nko nyi, wölo ochilinyi arwokyinyi.

²²“Anana lasiny ngölyontonï, akwa löwïr cho otöghöy Tororöt, wölo atomaghakwanye lenyoni, owonsokwa lömïs amelö mi chi nyo sörwokwa.

²³Konyïtanïn chi nyo konanïn sörö le amörostanyi asörunan nyo mötïny chi anka tïkwïl nyo rïpöy ngalechan.” Ompö kintöghoghinto tumï. Tum pö Daudi, otini kikïmwochï werkoyon Natan nyinte paraku cheporesnanenyi nko Patsyepa.