Read pokoot TUMWÖY 55 Bible Online

TUMWÖY 55 - pokoot bible

TUMWÖY 55

¹Terwante saghatengu, we Tororöt, ametagh riratenyan.

²Terwante aiwöghökwante, kyaghachan ompö kömpölelutköchan.

³Kowöghisyan ompö syala pungköchan nko pïro mwokïyis. Ipkanïn chane ghöyityö akïnörekyanïn ompö kireyat.

⁴Tïngeto mïkulöwunyan ngwonïn nyo wow, könguchanïn meghat.

⁵Kapotanan ompö otyogh, kelumanïn nyarïl.

⁶Opï kotïngetan köpepoy kötö opiltenan le cheptukö, ntatan wölo low atomuny.

⁷Kötö opilchinan wölo low atonyorï möngot ompö surkwen.

⁸Kötö orïpchinan lawel wöloni ataghïpa, wïsöto chepkïrïri nko nyo pö pögho nanam.

⁹Nyara tötutkökwa, we Echotyon, aikwangkwang ngalekwa. Kosöchan kanasyan köromnyö nko poryot

¹⁰cho kiwitwit pöghet nko nangat akunyïghit ghöyityö nko nyarïl.

¹¹Möngöy kinyarata ori, möngetonye pïrötö nko lïsat ortïnechi.

¹²Ntökö punyontenyan nyo kanyernyerenanïn, kötö omïkukönan ompö choni. Ntökö pkatyan nyo kengwïn akïmenö tawunyan, kötö owïngonan kegh nyinte.

¹³Wölo kichö nyi, nyo iköröy kegh nko ani, nyi nyo ichï kongenyan, nyo kikenagh kegh.

¹⁴Kyaman lökoy nko nyinte, kikïpetecha tïkwïl kesogho Kö pö Tororöt.*

¹⁵Nya kwam meghat chane, nya kïröytö chane ngwen kïsopchot, mi ghöyityö kisönkökwa.

¹⁶Wölo orirchinan ECHOTYON Tororöt kungarakanïn akïsörwanïn nyinte.

¹⁷Petöy lokechan nko rirutköchan wölo mi nyinte, tökwoghö nko pöghet nko nangat akïlïmöy nyinte kutinyan.

¹⁸Tyokanïn nyinte atachïwïtan pungköchan ompö poryot nyo mi tawunyan, ompöwölo chang pungköchan.

¹⁹Teröy Tororöt nyo pöytoy kïngata otini le könyisyok akïrïnta chane, ompöwölo möripöcha kirurutkachi anta sagh nyinte.

²⁰Köporyeghö kongenyan kongotichi akïpïstö muma nyo kyam tïkwïl.

²¹Onyïne le kumat ngalechi, wölo möro kong mïkulöwunyi poryot! Karamach ngalechi le mwagh, wölo mutöy le chok nyo ngatip.

²²Pïsyinö ECHOTYON nïkisïntöngu, atökïghetïn. Möpïstonye nyinte kerïntoy pipö man.

²³Wölo nyi, we Tororöt, nyo irongchini pïrïm pörichoni nko lïsichoni. Meghsot kïtomö kwit kwenu könyiswekwa. Wölo otwoytoninyi kegh, we Tororötïnyu. Ompö kintöghoghinto tumï. Kïrïp kegh nko tum pö “Chepïrïm nyo low.” Tum pö Daudi, otini kinam pipö Pilisti nyinte ompö kanasyanta Kat.