Read pokoot TUMWÖY 66 Bible Online

TUMWÖY 66 - pokoot bible

TUMWÖY 66

¹Asala pich löwïr Tororöt ompö kiteghat nyo pö ngörekyö!

²Otumchinö ororyeto kaynenyi, otönö nyinte ororyö ompö sölut!

³Mwochinö Tororöt lö, “Pö töngönchin kïtya tïkwïn cho ighenyi! Wow tya owesyengu nyo ighöy punköku kïpotonchö.

⁴Soghinyi pich löwïr ompö ngwïny. Tumunyi chane ompö sölut, sölöy chane kaynengu.”

⁵Apkana, arosa tïkwïn cho kigh Tororöt, tïpö töngönchin cho kighchï ptangengmöt.

⁶Kiwaghach nanam kïyam, kuwer papotïnecha ompö kelyön. Kikïngörekyeghocha nyinte ompö atoni.

⁷Pöytoy nyinte kokay ompö owesyenyi akïmöröröy pipö punton. Tömötöp penyï lö kïporyegho nyinte.

⁸Asala Tororötïncha puntonï löwïr, nya kelïm sölutkachi.

⁹Nyinte nyini ripöy söponwecha amöpïstechanye nyinte kepïtyenö.

¹⁰Ketyamechanyi, we Tororöt, le ato kïtyömo silpa ma.

¹¹Kesakechanyi ompö kïsa aikonecha rötut cho nïkisöch kekasana.

¹²Kepïsyinyi pungköcha kïnyaghecha, kakiweracha ma akewer puseryon, wölo kemïtwechanyi ye koro perur.

¹³Opunan kongu aropunyi amörostin cho kïpelöy, akonyïtan kiwolwolutköchan

¹⁴cho kimwa ngalyapunyan, otini kyomitan nyarïl.

¹⁵Okoninyi amörostino kyak cho okwoghöch nko ropöwo mökol cho kïpelöy, okonunan ropöwo kir nko kwöghe.

¹⁶Apkana atera, löwïr, akwa cho okonyïtöy Tororöt atomwowok tïkwïn cho kighwanïn.

¹⁷Kyorirchan nyinte tökungarakanïn, asalan nyinte ompö tumwöy.

¹⁸Ntökile nyo kyasistan ngokichu, melö kitölïmwanïn Echotyon sowutkachu.

¹⁹Wölo nyoman, köterwanïn Tororöt, owöy, kalïm nyinte saghatenyan.

²⁰Osölan Tororöt, ompöwölo melö kitagh saghatenyan anta ngwïsenanïn chomnyenyi nyo pö kokay. Ompö kintöghoghinto tumï. Kïpöghisyegho pïkan. Tum.