Read pokoot TUMWÖY 68 Bible Online

TUMWÖY 68 - pokoot bible

TUMWÖY 68

¹Ngetöy Tororöt akutoyö pungkachi, pertoy chane cho wököy nyinte.

²Kutïtoy nyinte pich le yomat nyo kutïtoy ighöt, wonyegho mwokïyis tawu Tororöt, le tömönchö nyo yintegho atolekïtö ma.

³Wölo ngörekyot pikachi akïturönchï nyinte, ngörekyot chane akïtum ompö turönöt.

⁴Otumchinö Tororöt, asal kaynatenyi asagha nyinte nyo wegho poltoy. Kïkuro kaynatenyi ECHOTYON, ongörökyinö nyinte!

⁵Tororöt nyo möngöy konyi nyo tïlil. Kï papoto pönon akï ripinto mïsïktin.

⁶Töni Tororöt cho mi opïn wölo möngöy akutyak cho rötote akutö perur, wölo möngöy penyï kor nyo le siriron.

⁷Otini kintöghoghchinyi piköku, we Tororöt, otini kiweranyi surkwen,

⁸kïpotan ngwïnya, kïmïlï yïmö pögh ompö tawu Tororöt, Tororöt pö Sinay, Tororöt pö Israel!

⁹Kiropönchinyi ngwïny nyoman, we Tororöt, aitönönyi piköku owesyö cho kökikwoghochö.

¹⁰Kïnyorï chane möngot ompö korengu, kïnyorï meyï tïkwïn ompö köromnyengu.

¹¹Mwowu Echotyon ngalechi, kupertoy pöytoghï nko lïkoskökwa. Kïmwatïta korï cho chang lökoyechoni akupar ompö keston pöröw

¹³cho pö köpepoyi chepïrïmpen cho kikiluma silpa, keluma karorye koltin cho pïchighöch cho kiyeno kari taghoy, Ngo nyo tökïmököy kumpuröy akalu kechir?

¹⁴Otini kitoyö Kimuktoghin pöytoghï, kïkarkegh nko takarïs ompö kutïng pö Salmon.

¹⁵Wechï kogh kutïng pö Pasyan! Kutïng nyo tïng kutïngkot cho ngötipöch.

¹⁶Kölö ne nya kutïngkotichï tomchinökwa nyonyintön, kutïng nyo kikïl Tororöt lö otöpo? Töpo ECHOTYON wöloni kokay!

¹⁷Ngwïno Echotyon Sinay, kutöngu möngenyi nyo tïlil kïmi nko nkarinechi pö lïk cho owesöch cho makïrar.

¹⁸Pusöy nyinte kutïng akumïtöy pich cho chang cho kikïnama lïkos akutöni penyï nyinte ropöw. Möngöy ECHOTYON wöloni.

¹⁹Sala Echotyon nyo kösönöy nïkisïntinecha kïtenö osis. Tororöt nyinte nyo sörwecha.

²⁰Tororötïncha kï Tororöt nyo pö sörunötö, nyinte kï ECHOTYON, Echotyotencha nyo söru pich ompö meghat.

²¹Nyoman, lïwöy Tororöt mötöwo pungkachi, chane cho melö pïstoy otöptinekwa cho ghach.

²²Lentöy Echotyon, “Oyokunonan chane Pasyan, ayokunan chane nanam kwen,

²³atetömpïlönyi kisönkökwa akïmel kukïdineku cho teno cho kömököy.”

²⁴Sïwïyi pich löwïr kingwïnatengu nyo pö rïntagh, we Tororöt, kingwïnata Tororötïnyan, pöytoghintenyan, ntökwitïta möngenyi nyo tïlil!

²⁵Mi tumï kuntöghoghöy, kïrïpöy lötungwa pïti pïkantis, kïmi tipïn kwenungwa cho kitïng kwïrkwïris,

²⁶“Sala Tororöt ompö kwenu pikachi, sala ECHOTYON, pipö ara Yakopo löwïr!”

²⁷Kinya Penchamen nyo kimïnïng tya ompö chane, kïrïpta kintöghoghi Yuda nko pikökwa, kïrïpta kintöghoghi Saplon nko cho pö Naptali.

²⁸Porunö owesyengu, we Tororöt, owesyengu nyo kiporwechanyi tagh,

²⁹ompö Kongu nyo mi Yerusalem, ipunyi nyu pöytoghï ropöw wöloni.

³⁰Iteghchï Misri, makawunona, iteghchï kintöghoghi punton, okwot pö kir cho oketïyi nko mogh, ntökïtenö kïkonyïtinyi chane akïkwöwunyi silpa. Itoyö pich cho chömo kegh poryot.

³¹Pkonöy pich cho ghyongtoy koro Misri, syolöy pipö Etopya ewunekwa atökïsagh Tororöt.

³²Otumchinö Tororöt pöytoghi ngwïny, otumchinö Echotyon tumwöyi sölut,

³³nyinte nyo westegho wölnö le yïmwöy, wölini le yïmwöy könyisyok, nyinte nyini tïlöy kughum.

³⁴Amwatïtena owesyo Tororöt, mi ororyenyi paraku Israel akïmi owesyenyi wölnö le mïröt.

³⁵Pö Tororöt otyogh kïtya otini ngwïno möngenyi, Tororöt pö Israel nyinte! Töni pikachi owesyö nko kimukat. Sala Tororöt! Ompö kintöghoghinto tumï. Kïrïp kegh nko tum pö tapïkoy. Tum pö Daudi.