Read pokoot TUMWÖY 69 Bible Online

TUMWÖY 69 - pokoot bible

TUMWÖY 69

¹Sörwante, we Tororöt! Kelumanïn pögh ntökwitanïn kat.

²Kachïchïnanïn norayonta nyo wow, möminye chïchïmo kelyechan, kolïtön pögh ori, kikulumanïn puseryontö.

³Kokursyan ntaghach nka nyï ye kikïyam sïghintenyan. Kewongwï konyichan otini orirchininyi.

⁴Mito pich cho chang cho reyanïn kwïle akïchang chane kïtïl put cho mi mötïnyan. Chang pungköchan cho mïrchinanïn put, mököy chane kïpöranïn. Möchöy oyodonan tïkwïn cho melö kyachoran.

⁵Melö wïngote ngokichan ompö nyi, we Tororöt, inkïtönyi wölini ochan sölwö kïlïkwï.

⁶Mepïsyï kïsïch arasï ompö ani pich cho köninyi, we Echotyon TORORÖT Kimuktoghin. Mekany kïrörchï konyït akwompö ani, chane cho soghinyi, we Tororöt pö Israel!

⁷Kakïsasanïn ompö nyi nka nyï ye kelum tokochunyan arasï.

⁸Kalïkwan ton ompö piköcha, amakunkïtanïnye piko konyu.

⁹ Kewanganïn chomnyogh nyo otïngetan ompö kongu, kasasanïn pich cho sösinyi.

¹⁰Kisasanïn pich, otini kyamïnïngitan kegh akïrur.

¹¹Kiroröchanïn chane, otini kyalakan sarankwachtina lok.

¹²Ngölonenanïn chane, otini mi kokwengwa kuka kanasyan akïtumenanïn ptamasis.

¹³Wölo osoghinyi, we ECHOTYON, iterwante saghatenyu, we Tororöt, otini kechamanyi. Ilïm saghatenyan, we Tororöt, ompö chomnyengu nyo pö kokay, ompö kiyomisötengu nyo pö sörunöt.

¹⁴Sörwante tömochïchïnanïn norayonta, sörwante achïwïta pungköchan aikany achïwïtan puseryon nyo wow.

¹⁵Mekany kulumanïn puseryontö amekany kïnyïkwïdanïn pïrïm anta körchanïn ngwen kutinyi ori.

¹⁶Imölyöngwante, we ECHOTYON, kïrïp kegh nko chomnyengu nyo pö kokay airosante ompö kisyonötengu nyo wow.

¹⁷Mewïnga kegh mötworintengu, mölyöngwante lawel, ompöwölo omitan nyarïl.

¹⁸Rikuna atesörwante, sörwante ompö punkachu.

¹⁹Inkïtönyi sasat nyo kyonyorwan, nko arasï nko nyerat nyo kyonyorwan ainkïtönyi pungköchan löwïr.

²⁰Kenyar sasata mïkulöwunyan nka nyï ye kowongwan. Koyöran kisyonöt, wölo melö konyorwan. Kayaran soghsoghï, wölo monyorwanye.

²¹ Kikonanïn chane ködöwï, otini kyamatanïn kömöy. Otini kyamatanïn maral, kïkonanïn chane ngwana.

²² Nya kïlïkwï ichontinekwa ngöghöp, nko lïs ompö kongotikwa.

²³Nya kïköryö chane atömökurosïta akukudisyö kïrutayikwa kokay.

²⁴Imïlchï nörekyengu parakungwa, nya kïnyorï chane sïngiryengu.

²⁵Nya kïlïkwï kïratis wölo möngöy, mekany kïmang chi anka tïkwïl emenikwa.

²⁶Kechop kong pich cho ketönönyi sitöt akïtösyï moyoy pich cho kighanyi kïlïkwï kot.

²⁷Iyityï chane ngokikwa löwïr, mekany kïnyorï sörunötengu.

²⁸Ingongoghta kaynötutkökwa ompö kitapu pich cho söpsot amekany kekir chane nko pipö man.

²⁹Wölo omitan nyarïl nko kichïr, nya kïripanïn sörunötengu, we Tororöt.

³⁰Osölan kaynata Tororöt ompö tum, ororitan nyinte ayokyï sörö.

³¹Nyoni nyu nyo ngörökyini ECHOTYON, kïtïl keropchï nyinte tany anta kirïk kïmïkul.

³²Nya kïsïwa pich cho kichopöy kong akïngörekyö akukil kegh cho soghöy Tororöt,

³³ompöwölo terchini Tororöt chopot amelö wutyegho pikachi cho rötote.

³⁴Nya kïsal yïmö nko ngwïny Tororöt nko nanamtin nko tïkwïn cho mi oringwa.

³⁵Söru Tororöt Sayon* akïtek ngat kanastina Yuda. Möngöy pikachi korononi akïmïl.

³⁶Mïlöt monïngo mötworichi korononi akïmöngöy wöloni pich cho chömöy nyinte. Ompö kintöghoghinto tumï. Tum pö Daudi, ompö ropöwo kinonut.