Read pokoot TUMWÖY 77 Bible Online

TUMWÖY 77 - pokoot bible

TUMWÖY 77

¹Orirchinan Tororöt, orirchinan Tororöt tya, atökïlïm nyinte kutinyan.

²Osoghan Echotyon osiswo kömpölelyö, osyolan ewunechu kïyech, wölo monyorwanye saghsaghat.

³Otini kananan Tororöt ariran, otini kananan nyinte, kïmeghanïn mu.

⁴Ighanïn nyinte ochïkönan kïyech. Kowongwan, momukanye ntangalan.

⁵Ononan osiswo könyisyok anonan könyis cho kikuwer.

⁶Otepan kegh anonsyö oghö, ononan atepan kegh lö,

⁷“Kataghecha so Echotyon kokay? Melö tökuporwecha kisyonötenyi so ngat?

⁸Kikuwonyö so chomnyenyi kokay? Melö tökïpïntoy so kiyomisutkachi ngat?

⁹Köwutyeghö so Tororöt kïlïkwï kisyonin? Keker so nörekyenyi kisyonötenyi?”

¹⁰Atolapay olan, “Kowongwan nyu, otï kiwaghaka Tororöt nyo Töror Tya kïtaghanïn!”

¹¹Ononan ighisyewutköku, we ECHOTYON, mi mötïnyan töngönchin cho kighanyi könyisyok.

¹²Ononan tïkwïn cho kighanyi, nko ighisyewutköku cho echön.

¹³Tïlilöch ighisyewutköku, we Tororöt. Möminye tororöt anka nyo wow le nyï.

¹⁴Ichinyi Tororöt nyo ighöy töngönchintin. Iporchinenyi pipö punton owesyengu.

¹⁵Kisörunyi ompö owesyengu piköku, monïngo Yakopo nko cho pö Yosep.

¹⁶Kyotyö pögh otini kisïwinyi we Tororöt, akïpotan nanam ntökwitïta toye.

¹⁷Kïmïlï poltoy pögh kï tïl ilat ompö yïm. Kuryal kïghömï wop anka tïkwïl.

¹⁸Kichögh ilengu kelïma poltoy, kupkany kiryal ngwïny, kïpotan ngwïnya akurïngring.

¹⁹Kiwer arengu nanam kwen amelö kirumï kelyeku ompö pögh.

²⁰Kintöghoghchinyi piköku le kechir kuwerï Musa nko Aron. Tum pö Asap.