Read pokoot TUMWÖY 88 Bible Online

TUMWÖY 88 - pokoot bible

TUMWÖY 88

¹Orirchininyi, we ECHOTYON, Tororöt pö sörunötenyan, omitan oriro tawungu nangat.

²Terwante saghatenyu aikap yit ompö riratenyan.

³Ompöwölo omitan nyarïl kwen nyo karich olïtön ngwen.

⁴Kikeyitanïn le chi cho wetöy pïrïm, alatan chi nyo mötïnye

⁵le nyo kikewutyeghö nko pich cho kimeghö le chi nyo kikepar nyo mi pïrïm, le pich cho melö tenonenyi kokay, ompöwölo melö teripenyi.

⁶Kewirchaninyi pïrïm wölo tuw.

⁷Köyetï nyölotyengu tya ompö ani, akulumanïn le mirtin cho echön.

⁸Kighanyi kongotichan kïpïstanïn aighaninyi angutan le chesitöy. Kikïkartanïn nyo momukanye ntaperta.

⁹Könyörkölölitu konyichan ompö nyarïl akurinyi asis anka tïkwïl, we ECHOTYON, asyolunyi ewunechu ompö saghat.

¹⁰Nyiwu ne ato ighchinyi töngönchin pich cho kimeghö? Tökïngetuno so ngwen akïsalinyi?

¹¹Kïmwowuno so chomnyengu nyo pö kokay parsikon, anta lö, ichinyi nyo ghanate ompö wölo mi kinyarata?

¹²Kïsïwïyegho so töngönchintineku tuwïn, anta kïsöchï sörunötengu koro pich cho kikewutyeghö?

¹³Wölo orirchininyi, we ECHOTYON, opunyi saghatenyan tökwoghö anka tïkwïl.

¹⁴Ompö ne nya ECHOTYON, tewiraninyi? Kölö ne tewïnyenaninyi tokochungu?

¹⁵Kyowongwan kïngata ochan mïnïng ntökïrich ameghan, kyowonyan nyoman ompö kinyarilatengu akikïmeghanïn mu.

¹⁶Kelumanïn nyölotyengu nyo ngwan, kewanganïn pörchengu nyo pö otyogh.

¹⁷Kötïpanïn kwimön le puseryon akïpïranïn ompö woptine löwïr.

¹⁸Keghanyi kongotichan nko pöröris kïpïstanïn, kalïkwï nyu tuwïn kongenyan onkït. Tum pö Etan, chi pö Esra.