Read pokoot TUMWÖY 90 Bible Online

TUMWÖY 90 - pokoot bible

TUMWÖY 90

¹Kichinyi möngencha, we Echotyon, kïngata otini le könyisyok.

²Ichinyi Tororöt kokay nko kokay nyo kimito kïtomö kïpitï kutïngkotï akitomö ighanyi ngwïny.

³Iyodonyi ptangengmöt kïwö nyïngwïny ailenchinyi, “Omïlisyenö terït.”

⁴Karkegh ompö nyi, könyiswö cho le elpu akonga nko omötu nyo kikuwer anta akay kiwasan.

⁵Ipuchtonyi chane lömïs, le kirwotïtogh nyo potöy tökwoghö, le sus cho pïchighöch,

⁶cho topïköy tökwoghö, ato imönöy kisilonchö akïyomö.

⁷Kakiwonyecha ompö nörekyengu, kakyotyecha ompö köromnyengu.

⁸Kekörkorchinyi ghöyïntöncha tawungu, aisïwïyenyi ngokicha cho wïngote.

⁹Weröy osiswecha löwïr ompö nörekyengu akuwonyö könyiswecha le kimïny.

¹⁰Kimukecha kempure könyis tömönut mut nko odeny anta kö tömönut mut nko sömök ato karamach kisön wölo choni löwïr kwipu kömpölelut nko nyarïlwok, tangogh nyoman söpon, panini lawel kikewonyecha!

¹¹Ekï ngo nyo nkït ngwonïn pö nörekyengu? Ngo nyo köngöy sïngeryengu nya?

¹²Netecha keyitö osiswecho atökemuka kesïkö ngöghomnyö.

¹³Mïlena, we ECHOTYON, töpo nörekyengu nko oyï? Syonchecha, mötworiku.

¹⁴Paghenecha tökwoghö chomnyengu nyo pö kokay atöketumöcha akengörekyö osiswecha löwïr.

¹⁵Konecha otï le ye ompö osiswecha ngörekyö nyo kongityö nko nyarïl nyo pö könyis löwïr cho kikiwongucha.

¹⁶Iporwecha mötworiku ighisyewutköku akïsïwa monecha owesyengu nyo pö ororyö.

¹⁷Nya kïtöpö kisoyönötengu nko acha, we Echotyon Tororötïncha, aichïchim ighisyewutköcha löwïr.