Read pokoot NGÖTÏNYÖ 1 Bible Online

NGÖTÏNYÖ 1 - pokoot bible

NGÖTÏNYÖ 1

¹Chï kï ngala ngötïnyo Solomon wero Daudi pöytoghinto Israel.

²Ngalechï pö ngötïnyö kwighöy pich kïnyorï ngöghomnyö nko chilat, kïpköchï ngala cho mi ori,

³töni kïnyorï kinetut ompö ara ngöghomnyö nko köromnyö nko man nko kirwok nyo puryö kireyat,

⁴akutö sölwöy chïreryö akutö chumwak ngöghomyö nko kinkïtöt.

⁵Kï lïm chi nyo ngöghom atökïtas chïreryenyi, akutö chi nyo pköchini ngala kïnyorï kinetut.

⁶Kunkïtï chi ngala ngötïnyö nko körkeyïn nko ngala pich cho ngöghomöch nko tyankoykökwa.

⁷Kekonyït ECHOTYON kï towunöto ngöghomnyö. Wölo sösöy sölwöy ngöghomnyö nko chilat.

⁸Tera werïnyu, ngaleko kon amesas kïgh nyo netin yongu.

⁹Lïku kinetuchoni minata pöropchö ompö mötïngu akïlïkwï karïn cho mi katangu.

¹⁰Werïnyu, ato kïnkïnïn mwokïyis, mecham ngalekwa.

¹¹Ato mwowun chane lö, “Nyonö kepe keyaratena chi kepara, kïrkegh kömötïngcha lelut.

¹²Kenyïkwïdena chane kïsöpchot le ngwen akenyïkwïda le pich cho köröytö pïrïm.

¹³Kïnyorunecha tïkwïn cho pö olyot nyo wow, kinyïghitecha pöröw koricho.

¹⁴Nyonö ketuyenö tïkwïl nyu atöketönö tïkucho köröp akonga.”

¹⁵Mewö werïnyu, or akonga nko chane, irip keltöngu tömarïp arengwa.

¹⁶Ompöwölo ryoghchini chane ngokï kwigh akïmi kïpsach kïmïlta kisön.

¹⁷Ompöwölo meghöynye kïgh ngöghöp nyo kitöni wölo sïwïyi tarit nyo kïyöröy kenömöy,

¹⁸Syepisiyi akuwany nyo loko kegh opïn ighöy ngöghöp.

¹⁹Lata choni ortïna pich cho nyoruno tïkwïn charut, cho chengo pich cho kö pö tïkukwa söponwekwa.

²⁰ Kursïyi tya ngöghomnyö ompö apuke, kïlïmo wölo oltoghisyegho mïnchïrïs,

²¹kursyegho nïyet ngölono ngalechi wölo weröy ortïna kanasyan.

²²Ochömekwa sölwontön nko oyï nya sölwöyichï? Chömo kegh sösï sasengwa nko oyï, akïtöghöy sölwöy ngöghomnyö tökïtenö oyï?

²³Atera kinetutkochan oyinokwa kinonutköchan aporwokwa ngalechan.

²⁴Ompöwölo kyokursyan, ataghakwa ongitonchenö, kyoghïtan ewunyu akimöminye chi nyo kiyang,

²⁵ataghakwa kirurutköchan löwïr amayangakwanye rirunatenyan.

²⁶Ororöchinekwa tïkwïl ato omitekwa nyarïl, ongemokwa otini kechumchokwa tapan,

²⁷otini kechumchokwa tapan le chepkïrïri, akuchumchokwa nyarïl le pïchpïch, akuchumchokwa kömpölelyö nko ngwonïn.

²⁸Kuranïn nyu chane, wölo melö ongitönan kïlö kïyaranïn lasiny wölo mönyorwanïcha chane.

²⁹Ompöwölo kitagh chane ngöghomnyö amayangcha kuwagh ECHOTYON.

³⁰Atotöghekwa rirutköchan asas kitewutkochan lödo,

³¹Kïlenyona omöy akweko otöptinekwa akuchen chane tötukökwa cho ghach.

³²Ompöwölo pöröy sölwöy mastaghtöngwa akunyar chane ngalekwa cho lentöy kikïtïl lasiny.

³³Wölo töpo ato ripote chi nyo teröy ngalechan, pöyösöy kïpuryö otyogh nyi pö ghöyityö.