Read pokoot NGÖTÏNYÖ 11 Bible Online

NGÖTÏNYÖ 11 - pokoot bible

NGÖTÏNYÖ 11

¹Lilöy kïgh ECHOTYON kipimöw cho melö pö man, wölo ngörökyini nyinte kipimöw cho mïchinote.

²Ato ngwïn menötön, kungwïnöy tïkwïl arasï, wölo mi ngöghomnyö nko chona ipöy kegh ngwïny.

³Ntöghoghchini mantangwa pich cho pö man wölo wongöy mwokïyis kipotötengwa.

⁴Melö nyiwu kïgh mökosyö ompö asispa kirwok, wölo söru man, chi ompö meghat.

⁵Ntöghoghchini man pö chi pö man arenyi kuten, wölo pïtyini mwokïyon ghöyityenyi.

⁶Söru pipö man mantangwa, wölo nömöy mwokïyis pïrchinoghtinekwa.

⁷Ato ma mwokïyon, kupotöy kikönötenyi, akuwonyot kikönöto mwokïyon.

⁸Kïsöruno chi pö man nyarïl, kïwaghaka nyarïlnoni kutönchï mwokïyon.

⁹Poröy kutinyi chi nyo menkïtnye Tororöt pöröryenyi, wölo kïsöruno chi pö man chïreryö.

¹⁰Ngörököy kanasyanta ato kiperur pipö man, kïkany ato wonyo mwokïyis, kingörekyö pich akï yar.

¹¹Kitöroröy kanasyan ompö kiperuröto pipö man, wölo kïwöghököy kanasyan ompö kuti mwokïyon.

¹²Mötïnye ngöghomnyö chi nyo sösöy pöroryenyi, wölo sisöy chi nyo tïng pköchin.

¹³Ngongöy wïngut chi nyo swomsïyi, wölo wïngöy ngölyon chi nyo ghanate ompö mïkulögh.

¹⁴Potyot pich ato puryö kintöghoghin, wölo mi kalya ato changit kirurï.

¹⁵Chörököy chi nyo ghyongchini ton, wölo mi wölo tïghume chi nyo töghöy kughyongchini ton.

¹⁶Nyoru konyït korka nyo le pöropchon, kïnyorï sïkönöt pich cho kölkölech.

¹⁷Ipchini kegh tösunöt chi nyo talase, wölo nyörilöy portanyi nyo kolkol.

¹⁸Nyoru mwokïyon ropïyeni lïs, wölo nyoru chi nyo kötkötöy man ropöwon nyo mötïnye.

¹⁹Söpöy chi anka tïkwïl nyo metimtimonye ompö kighanat, wölo meghöy chi nyo rïpotoy ghöyityö.

²⁰Lilöy kïgh ECHOTYON pich cho kimostoy mötöwöy, wölo ngörökyini nyinte pich cho melö mi kigheghchin ortïnekwa.

²¹Möchïwïtönye mwokïyon nyonikïny mönyorï sitöt, wölo kïsöru pipö man.

²²Pïchighyo korka nyo mötïnye pköchin, kïlata taya koltin nyo mi söru lotura.

²³Wonyechini machata chi pö man köromnyö kïpoto, kuwonyechini kikönöto mwokïyon kirwok.

²⁴Mi chi nyo tötoy tïkuchi kisamta, kïtöso kïmökositu tya, kïmi chi anka nyo nömöy tïkuchi lö kïng, wölo puktegho kïgh tïku.

²⁵Sïkönonöy chi nyo le pöropchon akï chi nyo töni chi pögh, ketöni nyinte tïkwïl.

²⁶Chïpöy pich chi nyo wïngöy pagh wölo soyönote chi nyo oltoy.

²⁷Nyoru chomchin, chi nyo kilöy kegh ompö kïgh nyo karam, wölo nyoru ghöyityö, chi nyo yöröy ghöyityö.

²⁸Pïyïsöy chi nyo twoytoy kegh sïkönötenyi, wölo tuynönöy chi pö man le sökö cho nyörilöch.

²⁹Nyinte nyo nyörilöy kong katangwa, kïmöminye kïgh nyo mïlöy, akïlïku sölwö, mötworinto chi nyo ngöghom.

³⁰Otöpö chi pö man, kï ket pö söpon, ngöghom chi nyo söru mïkulis pö pich.

³¹Ato nyoru chi pö man ropöwon ompö ngwïny, kïnyoru nyo mötïng sitöt nyo ngwan chemwokïyon!