Read pokoot NGÖTÏNYÖ 14 Bible Online

NGÖTÏNYÖ 14 - pokoot bible

NGÖTÏNYÖ 14

¹Teköy korka nyo ngöghom konyi, wölo ngongöy sölwö konyi ompö morichi kegh.

²Wöghöy ECHOTYON chi nyo tenate ortïnechi, wölo sösöy chi nyo masteghate ortïnechi.

³Lenye kuti sölwö sitöt ompö nyinte, wölo ripöy pich cho ngöghomöch kutïwekwa.

⁴Möminye omisyö ato mökïngorsyö ompöwölo ngwïno omisyö kikilöto kegh.

⁵Mömïrönye put söwin nyo kighönöy, wölo mwoghöy putintön söwin nyo melö kighönöy.

⁶Yöröy karatakyanta ngöghomnyö amelö nyoru, wölo nyïmnyïm chïreryö ompö chi nyo tïng pköchin.

⁷Malena kegh chi nyo le sölwö, ompöwölo menyorchinenyinye nyinte ngala chïreryö.

⁸Chïreryo chi nyo ngöghom kï kunkïtï arenyi, Wölo lisat sölwontöno sölwöy.

⁹Rorochini Tororöt mwokïyis, wölo ngörökyini pipö man chomnyenyi.

¹⁰Nkït mïkulögh ngwonïntanyi onkït, amelö ghömtoy ngörekyenyi nko chi.

¹¹Pïyïsöy kö pö mwokïyon, wölo toku kö pö chi pö man.

¹² Mi or nyo sïwïyi chi lö karam, wölo sörömunyi kï meghat.

¹³Roröy chi kïrkegh kïnïkis mïkulöwunyi, ngörekyö nyarïl.

¹⁴Omöy chi nyo gha otöptanyi nyo gha, kwomöy chi nyo karam ighisyewutkachi cho karamach.

¹⁵Ghönöy sölwö kïgh anka tïkwïl, wölo nonchini chi nyo chïrer wölo wetïtoy.

¹⁶Ripöy kegh chi nyo ngöghom akïghöpönö ghöyityö, wölo möripönye kegh sölwö amotyonye.

¹⁷Ighöy chi nyo mïrmïr kïgh ompö sölwontön, wölo mïkukönöy chi nyo chïrer.

¹⁸Pïtöy sölwöy sölwontön wölo nyoru pich cho tïng pköchin sonkolyo chïreryö.

¹⁹Kïtïngchini mwokïyis pich cho karamach ngïrukisyegho pich cho ghach kukoti pipö man.

²⁰Kireyöy meywon, kïrkegh ompö nyini le pöröryenyi, wölo tïng sïkönö kongot cho chang.

²¹Mwokïyon chi nyo sösöy pöröryenyi wölo soyönote chi nyo syonchini mey.

²²Potyot nyo pö nyoman pich cho tötoy ngala ghöyityö? Wölo nyoru chomnyogh nko man pich cho tötoy köromnyö.

²³Mi tösunötö ighisyö anka tïkwïl nyo kilchini kegh chi, wölo ipu meywontön ngala kut kwïle.

²⁴Sïkönöto pich cho ngöghomöch kï ororyengwa, wölo syongöy nyu sölwöy sölwontönengwa kïpoto.

²⁵Soru pich söwintöno man, wölo wïchtoghin chi nyo mwoghöy putintön.

²⁶Tïngeto chi kikönöt nyo wöghöy ECHOTYON akïnyoru monechi wölo karam wölo ghyöghchini.

²⁷Kiwaghata ECHOTYON kï kompa pögho söpon, akwighöy chi kïghöpönö ngöghöpu meghat.

²⁸Ororyo pöytoghin kï chongïnto pikachi, wölo kïrïntoy pöytoghin ato ngörï pikachi.

²⁹Tïng chi nyo mesïnyoronye lawel pköchin nyo wow, wölo kusöy sölwontön chi nyo sïnyoro lawel.

³⁰Karamach chi kisön nyo kalyanate mïkulögh, wölo nunöy pïrchin koyo chi le saryan.

³¹Chi nyo reyöy meywon, kï kemwa Ighintenyi, wölo chi nyo syonchini mey, kïkonyïtöy Tororöt.

³²Kïkölöngöy mwokïyon ompö ighisyewutkachi cho ghach, wölo nyoru chi pö man ato ghïpo ompö mantanyi.

³³Töpo ngöghomnyö mïkulöwu chi nyo pköchini kïgh, wölo puryö ngöghomnyö mïkulis pö sölwöy.

³⁴Syolöy man kor, wölo arasï ngokï ompö pich löwïr.

³⁵Tïngeto chömchin pö pöytoghin mötworintö nyo ngöghom wölo sösöy chi nyo ighöy tïpö arasï