Read pokoot NGÖTÏNYÖ 15 Bible Online

NGÖTÏNYÖ 15 - pokoot bible

NGÖTÏNYÖ 15

¹Yodoy nörekyö mölyöngunötö nyo talase wölo ngetöy narek ngölyon nyo kolkol.

²Ngölonöy ngalyapu chi nyo ngöghom ngala chïreryö, wölo mïlu kutïwa sölwöy ngala sölwontön.

³Topönöy konyi ECHOTYON wop tïkwïl, topönöy pich cho ghach nko cho karamach.

⁴Karkegh ngala cho tölose nko sakïtyan nyo sopöy, wölo meghöy chi mu ngal cho ghach.

⁵Sösöy sölwö kiruröteto kwanta, wölo ngöghom chi nyo chömöy kepirir.

⁶Mito tïkwïn cho chang cho rorote kö pö chi pö man, wölo ityini nyarïl wölo omisyegho mwokïyis.

⁷Mwotïtoy chïreryö kutïwa pich cho ngöghomöch, meghönye pich cho le sölwöy lenyoni.

⁸Ghöchini ECHOTYON amöros pö mwokïyon wölo ngörökyini saghata pich cho tïlilöch.

⁹Ghöchini ECHOTYON ara mwokïyon, wölo chömöy chi nyo rïpöy tïlilïn.

¹⁰Nyoru sitöt nyo ngwan chi nyo mostegho or nyo karam, nyoru meghat chi nyo sösöy pïröt.

¹¹Ato nkït ECHOTYON kigh löwïr nyo mi ngwen nko kiwurat, kunkït nyu kïtya mïkulis pö pich!

¹²Möchömönye sösin kepïröy, ametönye wölo mi pich cho ngöghomöch.

¹³Ighöy mïkulögh nyo ngarakate tokoch kïlöpoyit, wölo ighöy kiwongunotö mïkulögh kïsïch nïkisyö.

¹⁴Yöröy chïreryö chi nyo pköchini ngala, wölo ngölonöy chik sölwöy sölwontön.

¹⁵Ghach osiswö löwïr ompö chi nyo kichopöy kong, wölo ngörököy kïnomnyö chi nyo pïghyongöy osis löwïr.

¹⁶Kaykay kïtïng chi tïkwïn cho ngörï akuwöghöy ECHOTYON kïtïl mökosyö nyo wow nyo mi awernan.

¹⁷Ngwangwa kyam rachan ompö ato mi pöghisyö, kïtïl kyam tany nyo akwagh nko punyontön.

¹⁸Ngetngetöy chi nyo mïrmïr syala wölo nuköy chi nyo mönörekönye lawel kwintan.

¹⁹Pito kato ara chi nyo le sosö, wölo pelate ara chi pö man.

²⁰Ighöy worö nyo ngöghom kwanta kïngarak, wölo sösöy chi nyo le sölwö kame.

²¹Ngörekyini chi nyo mötïngnye chïreryö sölwontön, wölo ighöy chi nyo tïng pköchin arenyi kïköchï.

²²Tosonchot tötut ato puryö kiruröt, wölo pïntoy ato mi kirurï cho chang.

²³Ngörököy chi ato yoda ngölyon kïköchï, ekïkaram nyu kïtya ngölyon nyo kïmwoghöy ompö asistanyi!

²⁴Töngöy ara chi nyo ngöghom parak wölo mi söpon atökïchïwïta nyinte ngwen wölnö le pïrïm.

²⁵Ngongöy ECHOTYON kö pö kanisanakyan, wölo woköy kö pö mïsïk.

²⁶Ghöchini ECHOTYON kinonut pö mwokïyon, ngörökyini nyinte ngala pich cho tïlilöch.

²⁷Ipchini chi katanyi nyarïl nyo nyoru sïkönöt ompö ara lïs, wölo söpöy chi nyo ghöchini kiyenöto egh.

²⁸Nonchini chi pö man wölo wöghöktoy ngal, wölo mïlu kuti mwokïyon tïkwïn cho ghach.

²⁹Low ECHOTYON ompöwölo mi mwokïyis, wölo lïmöy nyinte sowut pö pipö man.

³⁰Ngörokyini mïkulögh löpoyïn pö kong, akwighöy lökoyö cho karamach ko kïnyorï mwagh.

³¹Töpo chi kwenu pich cho ngöghomöch nyo lïmöy chilut cho karamach.

³²Sösöy kegh chi nyo möyongönye chilut, wölo tösöy pköchin chi nyo lïmöy chilut.

³³Kewagh ECHOTYON kï kö pö ngöghomnyö, akïnyoghöy tölosyö konyït.