Read pokoot NGÖTÏNYÖ 16 Bible Online

NGÖTÏNYÖ 16 - pokoot bible

NGÖTÏNYÖ 16

¹Muköy ptangengmöt kïtötöy wölo lata kinonutkachi, wölo ECHOTYON nyo mutöy ngölyonte.

²Rosöy chi lö karamach ngala löwïr cho ighöy ompö konyichi kegh, wölo sïwïyi ECHOTYON wölo lata mïkulis pö pich.

³Tönö ECHOTYON ighisyewutköku, atökïchïchïm tötutköku.

⁴Kigh ECHOTYON kïgh anka tïkwïl kïmi kerötenyi, kigh ompö mwokïyis kïlïkwï nyingwa asispa nyarïl.

⁵Ghöchini ECHOTYON chi nyo le menotyon, onkïtï nyo pö nyoman lö möchïwïtonye chichoni mungöt.

⁶Kïngöngöghtegho ngokï kighanat nko terchin, akïchïwïto chi ghöyityö ato konyït nyinte ECHOTYON.

⁷Ato ngörökyini ECHOTYON ortïna chi, kwighöy ompö chini le pungkachi kïghömö nko nyinte ompö kalya.

⁸Ngwangwa tïkwïn cho ngörï cho kïnyoruno ara man, kïtïl tïkwïn cho chang cho pö mïrwos.

⁹Nono chi mïkulöwunyi wölo wetïtoy, wölo ECHOTYON nyo nkït ato tïköy.

¹⁰Mi ngala pöytoghin werkoynön melö mostoy kutinyi ompö kirwok.

¹¹Mököy ECHOTYON ratilin cho pö man akï koghi cho kipimtoy löwïr cho mi mïlot kï ighisyenyi.

¹²Lilu pöytoghï ato ighöy ngokï, ompöwölo ghyongo ngacharu paytagh man.

¹³Ngörökyini pöytoghï kutuwa man, akïchömöy chane chi nyo ngölonöy ngölyonto man.

¹⁴Lenye nörekyo pöytoghin meghat, wölo nuköy chi nyo ngöghom.

¹⁵Mi söpon löpoyïn pö tokochu pöytoghin, akïlenye kisyonötenyi polta ila sarngatat.

¹⁶Kaykay kenyorï ngöghomnyö kïtïl koltin, akïmïchini kekïl pköchin kïtïl silpa.

¹⁷Ara chipo man kï kïghöpöno ngokï, komönöy chi söpontanyi nyo ripöy otöptanyi.

¹⁸Rïpöy kinyarata menöto kegh, kirïpöy chïntagh kwolöto kegh.

¹⁹Kayakay kumïnïngit kegh chi akïtöpö nko mey, kïtïl kupar chi pöröw nko menot.

²⁰Nyoru chi kisoyonöt nyo kopchini yit ngölyon, akusoyönote nyinte nyo twoytoy kegh ECHOTYON.

²¹Chïrer chi nyo ngöghom ompö mïkulöwunyi, akïtösöy onyïnio ngal chïreryö.

²²Ngöghomnyö kï kompa pögho söpon ompö chi nyo tïng, wölo sölwontön kï sito sölwöy.

²³Ighöy mïkulöwu chi nyo ngöghom ngalanatenyi kïchama, akïtösyini kinetut ngalechi.

²⁴Lenye ngala cho karamach kumat, onyïnchini söpon akï karamach ompö por.

²⁵Mi or nyo rumu lö karam ompö chi, wölo sörömunyi kï or nyo töngöy meghat.

²⁶Pöghisïyi machata chi pö kasï ompö orinyi, ompöwölo impoy nyinte muyenyi.

²⁷Tötöy ghöyityö chi nyo le mwokiyon, akïkarkegh ngalechi nko lyopöto ma.

²⁸Ngetöy syala chi nyo chumpönote, akupesyot chi pö semsem kongot cho chomsot nyoman.

²⁹Kïnkïnöy chi nyo körom pöröryenyi, akumït nyinte kïrïp or nyo melö karam.

³⁰Tötöy chi tïkwïn cho ghach nyo pïröy konyïn, ipu chi ngal cho ghach nyo kisïr kut.

³¹Kirawïni chi karwal cho pö ororyö, kïnyoru ompö otöp nyo pö man.

³²Karam chi nyo melö nöreköy lawel kïtïl chi nyo awes, akïkaram nyo tungöy mïkulöwunyi kïtïl chi nyo pöröy kanasyan.

³³Kïpörecha kwegh, wölo ECHOTYON onkït nyo le mutinte.