Read pokoot NGÖTÏNYÖ 19 Bible Online

NGÖTÏNYÖ 19 - pokoot bible

NGÖTÏNYÖ 19

¹Kaykay meywon nyo kïltït arenyi, kïtïl chi nyo mörkelöch ngala akï sölwö.

²Melö karam kïtöpö chi kïpuryö chïreryö, akïlelöy chi nyo sörchini ngal.

³Ato par chi sölwontönenyi, kurïp kïnörekyï ECHOTYON.

⁴Ipu mökosyö kongot cho relach cho chang, wölo pökodoy meywon kongenyi.

⁵Möwetanye kwïle amönyorï sitöt söwin nyo le putin, amöchïwïtönye chi nyo mwoghöy putintön.

⁶Möröy pich cho chang köromnyo chi nyo le pöropchon, akï chomnyegho chi anka tïkwïl chi nyo tötöy tïkwïn.

⁷Reyöy meywon werkökwa löwïr, lowöchitu nyu nyoman kongotichi ompö nyinte! Kïrkegh kïrïpata akïsoghsoghotoy chane, makïnyorunye chane.

⁸Chömöy kegh chi nyo yöröy ngöghomnyö, nyoru perur nyinte nyo rïpöy pköchin.

⁹Möwetönye kwïle mönyorï sitöt söwin nyo le putin, akupotöy chi nyo mwoghöy putintön.

¹⁰Melö mïchini sölwö kïmakosit, amelö mïchini sekeyon kïpayta pöytoghï.

¹¹Melö nyoghöy kïnöreköy chi nyo ngöghom, akï ororyenyi kïpïstö mayang lelut.

¹²Karkegh nörekyo pöytoghin nko tïlöto ngotïny, wölo lenye köromnyenyi röyön ompö sus.

¹³Nyarïl worö nyo le sölwö ompö kwanta, akïlenye korka nyo nchïsöy kanïsan.

¹⁴Nyoruno chi tïkwïn nko sïkönöt katangwa, wölo nyorchini chi ECHOTYON korka nyo ngöghom.

¹⁵Töni chi sosönöt rïwon nyo nïkis, wölo omöy kömöy chepkowö.

¹⁶Ripöy chi söpontanyi nyo rïpöy kirurut. Meghöy chi nyo melö yongöy wölo töptoy.

¹⁷Pösönchini ECHOTYON chi nyo syonchini mey, akïghokchini ECHOTYON nyinte ompö ighisyenyi.

¹⁸Pïrö werïngu otini tökïmi kikönötö, Wölo memung ompö mirmiryö.

¹⁹Nyoru sitenyi chi nyo mïrmïr, ompöwölo ato isörunyi nyinte, kïtelimenyi ngat ghete nyinte.

²⁰Köpchinö yit kiruröt aicham kinetut, atenyorunö ngöghomnyö ompö osis cho pkonöy.

²¹Tïng chi tötut chi cho chang ompö mötïnyi, wölo machata ECHOTYON nyo rïntoy.

²²Chömo kegh pich chi kighönöy, akï kaykay meywon kïtïl putin.

²³Ipu kiwaghata ECHOTYON söpon, akï nyinte nyo tïng kïpöghisïyi nyo karam, akï melö itini nyinte kïgh nyo gha.

²⁴Lutöy chepkowö egh otupenyi, wölo puryö kïgh nyo töni kut.

²⁵Mungö pkatyan atökïchïkan sölwö, pïrö chi nyo tïng pköchin atökïtasa chïreryenyi.

²⁶Ipu lalïyanat nko arasï worö nyo wököy kwanta akïyon kame,

²⁷Werïnyu, metagh tera kiruröt, tömepot menyoru chïreryö.

²⁸Sösöy kirwok söwin nyo puryö kinyiwut, akïnyïkïwöy mwokïyis ngokï.

²⁹Kikemutyï kichïmpisï kirwok, nko sitit cho kumungo sölwöy.