Read pokoot NGÖTÏNYÖ 20 Bible Online

NGÖTÏNYÖ 20 - pokoot bible

NGÖTÏNYÖ 20

¹Ipu dipay* kingörerat, kwipu kumïn syala, akwanka tïkwïl nyo köperöy kumïn kïmelö ngöghom.

²Otyegho pich nörekyo pöytoghin le tïlöto ngötïny, akï chi nyo ighöy nyinte kïnarek kïmeghöy.

³Kïkonyïtöy chi nyo melö syölin, wölo syölin chi nyo le sölwö.

⁴Möngorsïyinye chi nyo le sosö otinö kö syökwï ilat, somsyotoy nyu nyinte osiswo kasa amönyorunye kïgh.

⁵Lenye kinonut pö chi nanam nyo kiwes to, wölo römu chi nyo tïng pköchin.

⁶Poru chi anka tïkwïl köromnyenyi ompö chitö anka, wölo ngo nyo muköy kïnyoru chi nyo kighönöy?

⁷Chi pö man nyo kïltït arenyi, kusoyönote monechi.

⁸Otini kötöpö pöytoghintö ngacharunyi kurwok töso ghöyityö anka tïkwïl konyochi.

⁹Ngo nyo muköy kïmwa lö, “Kyotïlilön mïkulöwunyu, ochan tïlil, motïngetanye ngokï?”

¹⁰Lïlöy kïgh ECHOTYON, ratilin nko koghïn cho möpöcha man.

¹¹Kinkïtu monïng ompö ighisyewutkachi ato tïlilöch akï pö man kïgh nyo ighöy.

¹²Kigh ECHOTYON yit nyo lïmo kïgh, akwigh tïkwïl kong nyo rostoy.

¹³Mechama rïwön atömelïkwï meywon, chïkana atenyorunö omisyö nyo wow.

¹⁴Lentöy olin, “Gha, gha,” wölo nyini köwechï kegh, kïkwol nyu kegh.

¹⁵Mito koltinö nko koghïn cho chang cho pö olyot nyo wow, wölo kï nyo pö kinyiwut tya chïreryö.

¹⁶Chengena sïra chi nyo keghyongchï pösön pö ton, ainam kïlïkwï kiporunöt ompö chi nyo ghyongchini pïnot.

¹⁷Onyïnchini chi omisyo mïrwos, wölo otinö kewonyö kïnyïghï ngayam kutinyi.

¹⁸Pïntoy tötut cho kakïchomnyechï, meset lïk atotomönye nkïtunö wölo kïpetïtoy.

¹⁹Ngongtoy wïngut chi nyo le kiswomin, malena kegh pich cho ngölonöy kïsamta.

²⁰Chi nyo chïpöy kwanta anta kame, kemisöy söpontanyi kïtuwit lömïs.

²¹Ato nya chi kïnyorï tïkwïn lawel, kïpïyïsyot ato le löt.

²²Memwagh lö, “Otököy ghöyityö,” kanya ECHOTYON tökungarakïn.

²³Lilöy ECHOTYON ratilin cho melö pö man, amelö karamach kipimöw cho pö putintön.

²⁴Ighöy ECHOTYON kelyo chi kïpa, muköy nyu chi lö ne kunkïtu kegh?

²⁵Lïku ngöghöp ompö chi ato sörchï kïgh lö, “Otöni kïgh Tororöt.” Akwoto mi soya kïmökwighnye lenyini kömwoghöy.

²⁶Kwöghöy pöytoghintö nyo ngöghom mwokïyis akïnyïnyïgh chane.

²⁷Kitömöwonto ECHOTYON mïkulöwu chi, nyo syoköy tïkuchi löwïr cho mi orinyi.

²⁸Tighöy kitenata nko konyït pöytoghin, akïtighöy köromnyö paytaghtanyi.

²⁹Ororyo chumwak kï owesyengwa, wölo köromnyo poy kï karwalekwa.

³⁰Sakïtyanta ghöyityö mungötö nyo ngwan lakat, akutïlilöy sitöt otöp pö chi kurel ori.