Read pokoot NGÖTÏNYÖ 21 Bible Online

NGÖTÏNYÖ 21 - pokoot bible

NGÖTÏNYÖ 21

¹Lenye mïkulöwu pöytoghin ara pögh nyo yintoy ompö mori ECHOTYON, muköy kïsat kughegh wölini kömököy.

²Tenate or anka tïkwïl ompö konyichi kegh, wölo pimöy ECHOTYON mïkulögh.

³Chömöy ECHOTYON kegh ngala man nko kitenat, kïtïl amöros nyo kitötoy.

⁴Konyi sas nko mïkulögh nyo kwolöy kegh, kuporu lötok ngoki pich cho ghach.

⁵Ipu tötut pö chi nyo kilöy kegh chongïn pö tïkwïn, wölo chichona sörchini tïkwïn kïlïku meywon.

⁶Tïkwïn cho kïnyoru ompö ara lïs kïtenyöy le röyön akï ngöghöpu meghat.

⁷Wongöy mwokïyis kölkölyengwa, ompöwölo töghoy chane kwighöy kïgh nyo tenate.

⁸Chumpönote ara chi pö sïrïp, wölo tenate otöp nyo chi nyo tïlil.

⁹Kaykay kïpïrchï kegh chi luchpa kö ato le monchögh, kïtïl kemang kö nyo pöro nko korka nyo le syölin.

¹⁰Pïrchini mïkulöwu mwokïyon ghöyityö, melö syonchini ompö nyini le pöröryenyi.

¹¹Ato kïmuny kichïmpisin, kïngöghomitu sölwö, akwoto kinet chi nyo ngöghom, kïtösöy pköchin.

¹²Sïwïyi Tororöt nyo tïlil wölo lata kö pö mwokïyon, akïtortoy mwokïyis kuwonyö.

¹³Melö kïlïmchini chi lokechi nyo köröy yitichi, ompö loko meywon.

¹⁴Nuköy nörekyö kïgh nyo kitötoy ompö wïngat, akuwongöy mïrmïryö ropöwontö nyo kighuponuy.

¹⁵Ato igha man, kï ngörekyö ompö chi nyo tenate, wölo meghsot mutïnö mwokïyis.

¹⁶Otyeghchini chi nyo pïstoy ara pköchin, kïmi kwenu mïntïrichöy.

¹⁷Lïku chi meywon nyo serseröy tïkwïn, amölïkunye sïkön chi nyo chömöy dipay* nko mwowöy.

¹⁸Nyoru mwokïyon sitöt mönyorunye chi pö man nyoru mungöt chi nyo puryö kighanat nyo kötö nyoru pipö man.

¹⁹Kaykay kïmang chi kor nyo le surkwen, kïtïl kïmang chi nko korka nyo syölöy akunchïsöy.

²⁰Rorote tïkwïn cho pïchigh ompö ka chi nyo ngöghom, wölo serseröy tïkwïn chi nyo le sölwö.

²¹Ngöghöy karwal akïnyorï chi konyït nyo ighöy nko man nko köromnyö.

²²Ghotöy chi nyo ngöghom kanasyanta pich cho owesöch, akurultö wölo ketwoytoy kegh chane.

²³Chi chona ripöy kutinyi nko ngalyapunyi, kïripo kegh kömpölelyö.

²⁴Kïkuro chi nyo kwolöy kegh, “Sösin,” chi nyo ighöy ngal ompö menöt.

²⁵Tïghöy pïrönotyon machatenyi, ompöwölo töghoy morichi kwighöy ighisyö.

²⁶Montoy tïkwïn chi nyo gha kwimön, wölo tötoy chi nyo karam amöghetönye.

²⁷Ghöchini ECHOTYON amöros pö mwokïyis, ghach nyu kïtya, ato ipï ompö keröt nyo ghach!

²⁸Potöy söwintön nyo pö putintön wölo ngötu söwintono chi nyo lïmöy.

²⁹Ighöy kegh mwokïyon lö ochï nyakan, wölo nonchini chi nyo tenote lasin wölo wetïtoy.

³⁰Möminye ngöghomnyö anta pköchin, akï möminye kirurötö nyo muköy kïrïntoy ECHOTYON.

³¹Kïröy angole kïtöpö kïpsach ompö asispa poryot, wölo ECHOTYON nyo pö rïntagh.