Read pokoot NGÖTÏNYÖ 23 Bible Online

NGÖTÏNYÖ 23 - pokoot bible

NGÖTÏNYÖ 23

¹Ngöghomnyö nyo pö mut nko akonga Ato iyomisïyi nko pöytoghin, ikany kïpköchin lasiny lö ngo nyoni impurenyi tïkwïl,

²aipïr muyengu ato ichï chi nyo omöy omisyö nyo wow.

³Mekany kusutyin mu omisyewutkachi cho onyïn, ompöwölo chutuneninyi omisyewut choni. Ngöghomnyö nyo pö mut nko odeny

⁴Mesusö kegh ighisyewut lö tosïkönon, ngöghomitunö lasiny atetagha.

⁵Wetöy sïkönöt lö weng, ompöwölo pitöy köpepoy, akupiltö le sich kïtopön yïm. Ngöghomnyö nyo pö mut nko sömök

⁶Meam omisyo chi nyo tupu kinyi kong, amepïrchï omisyewutkachi cho onyïn,

⁷ompöwölo riröy mu tïkuchi. Lenchininyi, “Omisyenö aigheghsyö!” Wölo low mïkulöwunyi nko nyi.

⁸Ingungunenyi pïtönononi kyamanyi, akupotyegheninyi ngaleku cho onyïnech. Ngöghomnyö nyo pö mut nko angwan

⁹Mengalan kïlïmöy sölwö ompöwölo sösöy nyinte ngöghomnyeto ngaleku. Ngöghomnyö nyo pö taman

¹⁰Menategha rotyo könyisyok, anta imas pareni pönon,

¹¹ompöwölo awes Kityokintengwa, söröpu chane akïporyegheninyi. Ngöghomnyö nyo pö taman nko akonga

¹²Igha mïkulöwungu kïparta wölo mi kinetata aigh yitïngu kïlïm ngala ngöghomnyö. Ngöghomnyö nyo pö taman nko odeny

¹³Memul monïng sitöt, ato imungenyi monïng lïkïp kïmelö meghöy.

¹⁴Ato imungenyi nyinte lïkïp, kï kesörunenyi söpontanyi ngwen. Ngöghomnyö nyo pö taman nko sömök

¹⁵Werïnyu ato ngöghom mïkulöwungu, kïngörököy mïkulöwunyan tïkwïl.

¹⁶Turönöy söpontönyan ato imwaghanyi tïkwïn cho pö man. Ngöghomnyö nyo pö taman nko angwan

¹⁷Mekany kwomchï mïkulöwungu nyonyintön mwokïyis, wölo waghanyi ECHOTYON kïtenö osis.

¹⁸Mito kikönötö nyo pö osis cho pkonöy nyo mötïny, amelö kingötïyöy kikönötengu. Ngöghomnyö nyo pö taman nko mut

¹⁹Tera werïnyu aingöghomitï, aisötyï mïkulöwungu or nyo pö man.

²⁰Metöpö nko gheghinto dipaytin* anta kwenu pipö mutïn cho omöy pany.

²¹Ompöwölo lïku mey ptamasis nko chemutïn, akulokyini rïwöntö chi masaren. Ngöghomnyö nyo pö taman nko mut nko akonga

²²Iter ngaleko papongu nyo kisïkïn, amesas komöt ato yosit.

²³Ala man amealta nyonikïny, ala ngöghomnyö nko kinetut nko pköchin.

²⁴Turönöy tya papoto chi pö man, ngörökyini chi nyo köyï worö nyo ngöghom werïnyi.

²⁵Nya kïngarak kon nko komöt aikany kïturön yongu nyo kisïchïn. Ngöghomnyö nyo pö taman nko mut nko odeny

²⁶Werïngu, terwante omwowun kïgh, rïpa kelyechan lasiny.

²⁷Ompöwölo chepkartayan kï pïrïm nyo mi to, akï karkegh chepores nko kö pö pögh nyo kogh.

²⁸Syepisïyi nyinte le mosin akïtas pich cho puryö kighanat ompö kwenu mïrön. Ngöghomnyö nyo pö taman nko mut nko sömök

²⁹Pö ngo rirata tangany? Akï pö ngo rirata kötogh? Ngo nyo tïng syala? Ngo nyo tïng ngwïrngwïronöt? Ngo nyo pïröch konyïn?

³⁰Chane cho lingo dipay nyo kogh chane cho yörotoy kumïn cho ngwonöch.

³¹Meros kumïn otini tökïpïröch otini tökïwïchöy ompö kölöwö akïröytö nyo tapïlïl.

³²Ato mi söröm kïsïr le moroy, akïsïröy le mïny.

³³Sïwïyi konyiku mengwoy akïmwa kutingu tïkwïn cho chumpönote.

³⁴Ikörenyi kegh nko chi nyo rïwöy nanam kwen, anta karkegh nko chi nyo tönköro pentera meli wal.

³⁵Ilentenyi, “Kerapakanïn, wölo mamanïnye kïgh, kömunganïn chane, wölo malïmtanye, Ongetan oyï nya? Oyöran kumi walaka.”