Read pokoot NGÖTÏNYÖ 27 Bible Online

NGÖTÏNYÖ 27 - pokoot bible

NGÖTÏNYÖ 27

¹Mekwol kegh ompö asïyech, ompöwölo menkïtönyinye lö ekwipu ne asisoni.

²Nya kasalinyi chi anka, mekany kïlïkwï kutingu kegh, nya kïlïkwï ton, melö nyinte kegh.

³Nïkis kogh, kï nïkisöch ngayam tya, wölo nïkis nörekyo sölwö kïtïl choni kwodeny.

⁴Nörekyö kï ngwan akï kiwurin wölo nyo muköy kughyongo tawu nyonyintön?

⁵Ngwangwa chilata nyo rumu, kïtïl chomnyogh nyo wïnyate.

⁶Moyoy cho koninyi kongengu kïpö man, wölo irip kegh chamata punyon nyo wow.

⁷Sösöy chi nyo pïghyongote kumat, wölo anyïn kïgh anka tïkwïl nyo ngwan ompö chi nyo sutate,

⁸Karkegh chi nyo le katurökyön nko tarit nyo kepotö konyi.

⁹Ighöy mwagh nko tïkwïn cho ngutoy nyo karam, mïkulögh kïngarak, wölo köreröy nyarïl mïkulögh.

¹⁰Mechal kongengu anta kongeto kon, amewö koto werïngwo ompö asispa nyarïltangu. Kaykay pöröryengu nyo lekït kïtïl werïnkwa nyo low.

¹¹Ngöghomituno werïnyu aigh mïkulöwungu kïngarak, atamukan oyokyï chi nyo gheghchinanïn.

¹²Sïwïyi chi nyo ngöghom tapan akïwïny kegh, wölo letöy tagh sölwöy ntökïnyorï nyarïl.

¹³Chenga sïra chi nyo keghyongchï ton, ainam nyinte kïkar pösönto tontononi.

¹⁴Chi nyo soyönöy pöröryenyi ompö pölö akï ngetöy otini kewas, keyitöy lö köchïpisyö.

¹⁵Karkegh korka nyo le syölin nko kanïsan,

¹⁶karkegh chi nyo lentöy oyodoy, nko chi nyo yodoy yomat, anta rama mwagh ewunyi nyo pö tagh.

¹⁷Lïtöy karïna karïn, kïlïtöy chitö anka chitö anka.

¹⁸Chi nyo ripöy moköngwö, kwomöy akwechi, akekonyïtöy chi nyo pöghisyechini echotyontenyi.

¹⁹Kïle ato rosöy chi kegh ompö pögh, kuporu kinonut pö chi, otöpö chi.

²⁰Möpïghyongöcha kïgh ngwen nko Kiwurat nyonikïny, kïlenyoni tïkwïl ompö konyi chi, möpïghyongicha kïgh.

²¹Kitïlilo silpa tör, ketïlilo koltin ma nyo wow ketyömo chi kikusatenyi.

²²Kïrkegh ketïgh chi nyo le sölwö ompö könö aketïghotïgh nko pagh, wölo möngetonye chichoni sölwontönenyi.

²³Inkïtï lasiny wölo lata okwotiko kechiryeku, airip lasiny kyakiku,

²⁴ompöwölo melö pö kokay sïkonöt, amelö töpo kirawuni pïnwöy löwïr.

²⁵Ato kïmut sus akusïl cho ngörngöre, akeghamïtï sus ompö komos,

²⁶Kïkoninyi kechir sïro, akwolunyi par, ngaror.

²⁷Inyorunyi chepö ngaror cho kïlïwöy, cho ghömöy kongu, nko tipïn cho pöghisyewunyi.