Read pokoot NGÖTÏNYÖ 28 Bible Online

NGÖTÏNYÖ 28 - pokoot bible

NGÖTÏNYÖ 28

¹Pertoy mwokïyon kïrkegh melö kayon chi wölo nyökon pipö man le ngötïny.

²Ato wïr korö, kïwöghökonöy kegh pöytoghï kïchangit, wölo chïchïmöy koro akulet tagh, ompö kintöghoghï cho tïng pköchin nko chïreryö.

³Karkegh meywon nyo wököy meyi walaka nko rop nyo ipu chepkïrïri nyo metukönye omisyö.

⁴Sölöy mwokïyis pich cho melö yongöy kirurut, wölo poryegho pich cho ripöy kirurut mwokïyischoni.

⁵Mösïkucha mwokïyis man, wölo pköchini man pich cho yöröy ECHOTYON tya.

⁶Ngwangwa meywon nyo westegho mantanyi, kïtïl sïkön nyo chumpönote ortïnechi.

⁷Ngöghom worö nyo ripöy kirurut, wölo töni arasï kwanta nyo nomnyotoy nko chemutïn.

⁸Chi nyo sïkönonöy ompöwölo pösöntoy akïghak tösöw cho chang, kïghömïtyini chi nyo yongöy mey.

⁹Ato waghach chi yitïnyi atömalïm kirurut, kulilu nyini le ompö saghatenyi.

¹⁰Chi nyo kïnkïnöy chi pö man kïrïp or nyo gha, kupïtyini pïrïmpenyi kegh, wölo nyoru mïlat nyo karam pich cho mötïngcha kigheghchin.

¹¹Ngöghom sïkönö ompö konyichi kegh, wölo nkïtu meywon nyo tïng pköchin nyinte.

¹²Nyoru ororyö nyo wow ato rïntoghisyö pipö man, wölo ato nget mwokïyis, kïwïny pich kegh.

¹³Mönyorunye perur chi nyo wïngöy lelutkachi, wölo nyoru kisyonöt nyinte nyo ngongtoy akïpïstö.

¹⁴Soyönote chi nyo wöghöy ECHOTYON kïtenö osis, wölo chïnchini nyarïl nyinte nyo oghïghitöy mïkulöwunyi.

¹⁵Karkegh pöytoghintö nyo le mwokïyon nyo pöytoy mey nko ngötïny anta chepökerï nyo yonöy pich.

¹⁶Pöytoghin nyo mötïngnye pköchin kïpöytegho kat, wölo pöytoy nyo kogh nyinte nyo ghöchini tïpö mïrwos.

¹⁷Ato sus kegh chi ompöwölo kamïlta kisönko chitö anka, akany kïlïkwï pïnotyon ntökïma, mengarak chi nyinte.

¹⁸Kïsöru chi nyo westegho mantanyi, wölo chi nyo le lïsin, kïchïnchini pïrïm.

¹⁹Nyoru omisyö nyo wow chi nyo ngoröy parenyi, wölo nyoru meywontön nyo wow chi nyo le tankasan.

²⁰Nyoru perur nyo wow chi nyo ghanate, wölo nyoru sitöt chi nyo komchini sïkönöt.

²¹Melö karam kechomnyeghö pikö walaka, wölo ighöy pich lelyot ompö pïtöno makatyan.

²²Rïpchini sïkönöt chi nyo gha kong, akïmenkïtnye lö ityini nyinte meywontön.

²³Nyoru asïyech chömchin nyo wow, chi nyo gheghchini chitö anka, kïtïl nyinte nyo lïsisïyi.

²⁴Nyinte nyo choröy tïkuko kwanta anta kame akïmwa lö, “Melö ngokï choni,” kïmötïngnye sisïn nko chorï walaka.

²⁵Ngetöy poryot chi nyo le chepö mu, wölo sïkönonöy nyinte nyo ghönöy ECHOTYON.

²⁶Sölwö chi nyo könöy kinonutkachi kegh, wölo kïsoru anka tïkwïl nyo westegho ngöghomnyö.

²⁷Melö rörchini kïgh chi nyo pöghöy mey, wölo chïpöy nyinte nyo wïnyo konyichi mey.

²⁸Ato nget mwokïyis, kïwïny pich kegh, wölo otini kewonyö chane, kïtösisyö pipö man.