Read pokoot NGÖTÏNYÖ 29 Bible Online

NGÖTÏNYÖ 29 - pokoot bible

NGÖTÏNYÖ 29

¹Nyinte nyo wow möt akikechil kïnyïl cho chang, kemïreghöy lawel amelö tökïsöröro.

²Ngöreksot pich ato pöytoy pipö man, wölo ato payta mwokïyis kungerötöy pich.

³Ighöy chi kwanta kïngarak nyo chömöy ngöghomnyö, wölo nyinte nyo nomnyotoy nko chepkarten kuyitïtoy tïkuchi.

⁴Chïchimöy pöytoghintö kor ato pöghisyeghö kitenat, wölo wuröy korononi nyinte nyo mököy tïkwïn cho kiyenuno egh.

⁵Ato putput chi pöroryenyi, kwighchini kelyechi ngöghöp.

⁶Kïnömo mwokïyon ngokichi, wölo tumöy chi pö man akïturön.

⁷Nkït chi pö man tïku man cho pö mey, mösïkunye mwokïyon kinkïtöt nyo lata nyoni.

⁸Pelöy kanasyan pich cho le kichïmpisï, wölo yodoy pich cho ngöghomöch nörekyö.

⁹Ato möl kegh chi nyo ngöghom nko sölwö, nöreköy sölwö akumwoghsyö akïror nyo möngötönye.

¹⁰Ghöchini pich cho mïltoy kisön, cho pö man, akïyöröy mwokïyis söpontanyi.

¹¹Portoy sölwö nörekyenyi kïmïkul, wölo kïchöy chi nyo ngöghom akïsï.

¹²Ato yöpchï pöytoghinto yit ngala putintön, kïghochitu yetïntinechi lökïr.

¹³Tuyegho meywon nko pïrin atö akonga, ECHOTYON nyo töni löpoyïn konyikwa kwodeny.

¹⁴Ato rwokyï pöytoghintö meywon ompö man, kïchïchïmöy ngacharunyi nyo pö paytagh kokay.

¹⁵Ipu lïkïp nko chilat ngöghomnyö, wölo ipchini kame arasï monïng nyo kakïpïstö kïtirayan.

¹⁶Ato mi mwokïyis kïpöytoy kïtösisyot ngokï, wölo sïwïyi pipö man kipïtatengwa.

¹⁷Ichil werïngu atesïkö kimïny, ipchini turönöt mïkulöwungu.

¹⁸Potyegho wölo puryö werkoynön, wölo soyönote nyinte nyo komönöy kirurut.

¹⁹Möpïronye mötworintö ompö kut kwïle ompöwölo kïrkegh kunkïtï, kïmeghönye kïgh.

²⁰Kesïwenyi chi nyo sörtegho ngalechi nya? Mi kikönötö ompö sölwö nyinte.

²¹Nyinte nyo chömchini mötworintenyi tïkuchi kïngeta otini kitökïmïnïng, kungwïnöy chichoni ato le söröm kïlïku werïnyi.

²²Ngetöy poryot chi nyo yöröy ngew, akwighöy chi nyo mïrmïr ngokï cho chang.

²³Reytegho chi menotönenyi, wölo nyoru konyït nyinte nyo ipöy kegh ngwïny.

²⁴Ghöchini kegh chi nyo ghömsot nko chorin, lïmöy lö pïnï yi chïpötö, amöngongönye kut.

²⁵Ipu ngöghöp kiwaghata nyo kiwöghöy chi wölo mi ato tïghume chi nyo twoytoy kegh ECHOTYON.

²⁶Chang pich cho yöröy chömchin ompö pöytoghin, wölo nyoruno chi ECHOTYON kitenat.

²⁷Ghöchini chi nyo melö pö man chi pö man, wölo ghöchini mwokïyis chi nyo tenate orenyi.