Read pokoot NGÖTÏNYÖ 30 Bible Online

NGÖTÏNYÖ 30 - pokoot bible

NGÖTÏNYÖ 30

¹Ngala Akur wero Yake nyo pö Masa, Kilenchï Chi Itieli, ompö Itieli nko Ukal.

²Ochan sölwö nyoman, nyo melö tochan chi, motïngetanye pköchin pö ptangengmöt.

³Tomönye anetan kegh ngöghomnyö, amotïngetanye pköchin nyo pö Nyinte nyo Tïlil.

⁴Ngo nyo kapusta yïm akïrokwï nya? Akï ngo nyo kakïghamïta yomat morïnenyi? Ngo nyo kamömönchï pögh sïra? Akï ngo nyo kichïchim luchtina ngwïny kïmïkul? Ngo kaynenyi akï ngo kayneto werïnyi? Inkïtönyi nyoman!

⁵Kikekïniniö ngölyon anka tïkwïl nyo pö Tororöt, longa nyinte ompö pich cho ghïpo kegh nyinte.

⁶Metas ngölyon ompö ngalechi atömachilïn nyinte airumï lö ichï putin.

⁷Osominyi tïkwïn odeny, metaghenante kïtomö amegh.

⁸Nateghenante putintön nko lïs, mekonanïn meywontön anta sïkönöt, wölo konaninyi omisyö nyo mïchinanïn,

⁹tömopïghyan ataghinyi alan, “Ngo ECHOTYON nya?” Anta alïkwan meywon achorsyö, asïmnyonön kaynata Tororötïnyu.

¹⁰Memïn mötworin ompö tawu echotyontenyi, tömöchïpïn, akïnamïn lelata.

¹¹Mi pich cho chïpöy papotïnekwa amesoyönöcha kamati.

¹²Kimi pich cho tïlilöch ompö konyikwa kegh, wölo tomöcha kewunö sïmnyontönengwa.

¹³Mi pich cho kwolöy kegh kïtya ompö konyikwa akiköpurisyö konyikwa kïtya!

¹⁴Mi pich cho ngötipöch kelat le chokon cho karkegh kelekwa nko rotwoy, cho wonyo mey ngwïny lömïs, nko cho le chopot ompö kwenu pich.

¹⁵Tïngeto pinyinya tipichi odeny, riryot chane kïlentöy, “Konö, konö,” Mi tïkwïn sömökï cho möpïghyongicha nyonikïny, mi angwanï cho mölentöcha, “Kakïten.”

¹⁶Ngwen nyo le sonö kor nyo möpïghyongöy pögh nko ma nyo mölentöy, “Kakïten,” nyonikïny.

¹⁷Ködötu kukayoy pö tömkö akwam mötonywö kompa chi nyo nyerero kwanta akïsösöy möterchï yonyi.

¹⁸Mi tïkwïn sömökï cho pö töngönchin tya ompö ani, angwan cho monkïtönye,

¹⁹mi ara sich wölnö le mïröt kïmi ara moroy paraku ghat, kïmi ara meli kwenu nanam nko wölo töptoy chi nko työ.

²⁰Lata nyoni wölo töptoy korka nyo le chepores, omisïyi nyinte akïmis kut, akïlö, “Maghanye kïgh nyo gha.”

²¹Potönöy ngwïnya ompö tïkwïn sömök, mökömöghönye ompö tïkwïn angwan:

²²ato lïkwï sekeyonta pöytoghin nko ato pïghyö sölwö omisyö,

²³korka nyo kïsösöy ato nyorï santenyi nko työ nyo le mötworin ato sara korketo kayoni santenyi.

²⁴Mï tïkwïn angwanï ngwïny cho mïnkech, wölo ngöghomöch chïreröch nyoman

²⁵pich togh amelö owesöch, wölo rorchini kegh omisyewutkökwa osiswo kömöy

²⁶Pich köneroyï amelö owesöch wölo ighöy ghatoy kïlïkwï kestonikwa.

²⁷Mötïngcha talam pöytoghin wölo petïtoy chane akonga ompö söpïchis.

²⁸Imukenyi namena pönkös ewuneku, wölo mi kori pöytoghï.

²⁹Mi tïkwïn sömökï cho mïlöy pich pantangwa, angwan köny cho karamach pantangwa:

³⁰ngötïny nyo awes tya ompö tyonkïn amewöghönye kïgh nyonikïny,

³¹nko kïrpö kokoroch nyo wököy, nko kwaghapa ngaror, nko pöytoghin ompö tawu pikachi.

³²Ato kilïkunyi sölwö nyo kikwol kegh anta ato kemitenyi inonöy ghöyityö, ikara ewungu kutingu.

³³Ompöwölo ngwïnöy mwagh ato kisach chö kïpkono kisön sör ato kïparpar ato ingetngetanyi nörekyö kwipu poryot.