Read pokoot NGÖTÏNYÖ 31 Bible Online

NGÖTÏNYÖ 31 - pokoot bible

NGÖTÏNYÖ 31

¹Ngala Lemuel, pöytoghinto Masa cho kinet yonyi,

²Ne nya, werïnyu? Ne kitö nya monto muyenyu? Ne nya, werto mumoskachu?

³Metö kor owesyengu, amelö ortïneku chane cho wuröy pöytoghï.

⁴Melö pö pöytoghï, we Lemuel, melö pö pöytoghï kïgha dipay,* anta mïchï pöytoghï kïpïrchï kumïn cho ngwonöch,

⁵atömötöp ntökïgheghsyö chane akïwutyeghö kirurut akïmas man nyo pö pich löwïr cho mi nyarïl.

⁶Tönö kumïn cho ngwonöch chi nyo mi kuwonyot akï pö dipay chane cho mi nyarïltangwa nyo ngwan,

⁷nya kïgha akïwutyeghö meywontönengwa, atömökunan ngat kiwongunötengwa.

⁸Nganya kutingu aingölonchï chi nyo mangate, atesöröpunö pich löwïr cho kikepïstö kïtïpï opïn.

⁹Nganya kutingu airwokyï ompö man, kamana manpa mey nko cho chopöy tïkwïn.

¹⁰Ngo nyo muköy kïnyoru korka nyo mïchini? Pïchigh nyinte tya kïtïl koghïn cho pö olyot nyo wow.

¹¹Ghönöy mïkulöwuto santenyi nyinte amörörchininye nyinte tïkwïn.

¹²Ighchini santenyi nyo karam amelö nyo gha, ompö osiswechi löwïr.

¹³Yöröy kokononi puto kechir nko wïsino katani, akïpöghisyegho chomnyogh.

¹⁴Karkegh nyinte nko melino mïnchïrïs, ipuno nyinte omisyenyi wölo löw.

¹⁵Ngetöy nyini le kiwasan akïpagh piko konyi akutö tipïn cho ighchini nyinte ighisyö pöghisyengwa.

¹⁶Nonöy par nyinte kwal, pöghisyegho ropïyen cho keghota akïkatkat sapipun.

¹⁷Mi kïpsach kwigh pöghisyenyi ompö owesyö akukilöy ewunechi.

¹⁸Pköchini nyinte lö tïng mïnchïrïsnönenyi tösunöt. Memisönye tayenyi, nöghöy kïyech.

¹⁹Nömo ket nyo kïpiriro usi ewunechi, akïnömöy morichi korope nyo piriröy usin.

²⁰Ngongchini nyinte morichi mey akïpöghöy pich cho le chopot.

²¹Mewöghönye lö ekïnyoru pöghöy piko konyi ompöwölo kilokyini piko konyi löwïr sïro cho pïroch lö tök.

²²Nöpchini kegh sïro cho kiyeno pöröy, pïchighöch sïrokachi cho pö katani cho lata akwa lamay.

²³Kinkït santenyi ompö ortïna kanasyan, otini töpo kwenu poyi kor.

²⁴Nöpöy kokononi sïro pö katani atökwalta, olchini angwoy pö mu mïnchïrïs.

²⁵Loköy nyinte owesyö nko konyït le sïro, amewöghönye kïgh ompö osis cho pkonöy.

²⁶Ngölonöy nyinte ompö ngöghomnyö, akïmi kinetutkachi cho pö tölosyö ngalyapunyi.

²⁷Rosöy lasiny otöptineko piko konyi amötöponye ngwïny kwïle, omöy kighotichi.

²⁸Ngetoy monechi akïkuro nyinte nyo soyönote akïsölöy tïkwïl santenyi nyinte

²⁹akïlö, “Kegh korï cho chang nyo karam tya, wölo ketïlanyi chane löwïr.”

³⁰Lïsin chomnyogh akï kwïle pïchighyö, wölo korka nyo wöghöy ECHOTYON kïmïchini kesal.

³¹Tönö nyinte akweko morichi, aikany kïsal nyinte ighisyewutkachi ompö ortïna kanasyan.