Read pokoot NGÖTÏNYÖ 8 Bible Online

NGÖTÏNYÖ 8 - pokoot bible

NGÖTÏNYÖ 8

¹Mökursïyinye so ngöghomnyö, ameteghunye so pköchin?

²Ghyongo tïkumwoköy cho töroröch akughyongo wölo ryomo ortïna

³wölo lekïto kukoti kanasyan, akutegh wölo kïlïto kanasyan kïlentöy,

⁴“Okurokwa aka löwïr, arirchinan chi anka tïkwïl nyo mi ngwïny!

⁵Akwa sölwöyichï, aneta kegh chïreryö. Akwa cho tomö onkïtï kïgh, atera lasiny.

⁶Atera ompöwölo ongölonan ngal cho karamach, akïpkono kutinyan ngala man,

⁷ompöwölo ngölonöy kutinyan man kwïle, akïghöchini kutinyan ghöyityö.

⁸Pö man ngalechan löwïr cho omwoghan, möminye ngölyon nyo masteghate anta nyo mörkel.

⁹Löpoghöch ngolechan löwïr ompö chi nyo tïng pköchin, akutenote ngolechan ompö pich cho yöröy chïreryö.

¹⁰Tacha kinetutkochan, melö ropïyen, aitach chïreryö kïtïl koltin cho pïchighöch.

¹¹“Ochan ngöghomnyö apoyan kinyiwut nyo wow, kïtïl koghïn cho pïchighöch, amelö mi kïgh anka tïkwïl nyo pïrchini chi, nyo kikongityot nko ani.

¹²Ani ngöghomnyö, nyo omöngöy nko tïnganat otïngetan chïreryö nko pköchin.

¹³Kewagh ECHOTYON kï ketagh ngokï. Otöghan kwolöto kegh nko menetön, atöghan otöp nyo gha nko ngal cho ghach.

¹⁴Otïngetan kirwok nko ngöghomnyö nyo tenate, otïngetan pköchin atïngetan kimukat.

¹⁵Pöytegho pöytoghï owesyenyan akïmutöy chane ngal ompö man.

¹⁶Pöyteghenanïn pöytoghï nko yetïntino ngwïny tïkwïl.

¹⁷Ochöman pich cho chömanïn, akïnyorwanïn chane cho yöranïn ompö kikilöto kegh.

¹⁸Mi sïkönöt ani nko konyït sïkönöt nko kiletat nyo mewonyotnye.

¹⁹Karamach akwechan kïtïl koltin, tïlöy ompö koltin chini pïchighöch, akïtïlöy kinyiwutyenyi silpen cho pïchighöch.

²⁰Owestoghenan ara tïlilïn, ompö kwenu ortïna man,

²¹otöninan sïkönöt chane cho chomanïn, anyïghit kaplawachtinekwa.

²²“Kimi ECHOTYON nko ani ompö kitoröto ighisyenyi, kïtomö ighisyewutkachi cho pö wuyay.

²³Kyomitan könyisyok kokay kïtomö kïmi ngwïnya.

²⁴Kyomitan kïtomö kegh nanamtin, akitomönye kïmi kori pöghon cho yintegho pögh cho möngörï,

²⁵kyomitan kïtomö ketor kutïngkot, akïtomönye kïmi kutïngkotï cho mïnkech,

²⁶otini kitomönye kwigh nyinte ngwïny nko koroswechi, anta chini le nyïngwi pö tagh.

²⁷Kyomitan otini kitor nyinte kwigh yïmwöy, otini kichwer machey kuwit nanam parak,

²⁸otini kitor poltoy ompö yïm, akwigh kori pöghon ompö nanamtin ori.

²⁹Otini kighchï nanam rotyenyi, atömöwirï pögh kïpeny kirurutyenyi, otini kitor pchörino ngwïny.

³⁰Kyomitan kamasunyi le chi nyo le tïngan, kyochan ngörekyenyi kïtenö osis, kyoturönön ompö tawunyi kïnomnyö.

³¹Ongörökyini ngwïnyinï möngöy pich, aturönchï ptangengmöt.

³²“Kïlenyona ye nyu werkachu, atere ngalechan. Soyönote chane cho rïpöy ortïnechan.

³³Atera kinetut atongöghomöchitunö, amatagh kinetut.

³⁴Soyönote chi nyo terwanïn, akïripsïyi ompö kukenyan kïtenö osis, akïkönyisyegho or nyo lïtu konyan.

³⁵Ompöwölo nyinte nyo nyorwanïn, kï könyoru söpon akïnyoru chömchin ompö ECHOTYON,

³⁶wölo ato mönyorwanïnye kunyoröy kegh, akï chane löwïr cho wökanïn kïchömöy meghat.”