Read pokoot OMTOGHIN 12 Bible Online

OMTOGHIN 12 - pokoot bible

OMTOGHIN 12

¹Inan Ighintengu ompö osisweko chumwaknanengu kïtomö kwitï osiswö cho ghach akïrikwï könyiswö ato ilentenyi, “Mongörökyinanye söpon.”

²Atoni nyu ato potöy löpoyïn pö asis nko arawa nko kokel akuyokwï kegh poltoy.

³Potonchot asisoni moriku cho köripinyi su, akïnyölnyölitu kelyeku cho kötö kïtïng owesyö. Ngörïngitu nyi kelat amakumukönye kïnyöghöy kïgh, akumirmiriyö konyiku.

⁴Köröy nyu kïgh yitiku amelïmenyinye chöghöto ngosyö pagh anta tumwöy, wölo muköy kwotyegheninyi töritwö cho tumöy kiwasan.

⁵Iwöghenyi nyu wölo kïpusöy akïlïkwï tapan kepesïta. Relitu mötïngu la ka, akupölinyi ompö nyini le kughotogh, akupoteninyi machata kïgh kïgh anka tïkwïl. Ompöwölo wetöy ptangengmöt kutöngöy katanyi nyo pö kokay, atolapay kelïma rira ortïna kanasyan.

⁶Kïtomö kïngötïyö pörköyo silpa anta kïtïgh otupo koltin anta megha kösïmö otini le kompa pögh anta mïrö ket nyo kighïngöy kengwïsuno pögh kompa pögh,

⁷akïmïla nyïngwïtyanta nyïngwïny nyini kingwïna, kïmïla mïkulögh wölini mi Tororöt nyo kikonï.

⁸Kïlö Omtoghintö, kwïle, kwïle. Wechï kwïle choni löwïr.

⁹Akwompöwölo kingöghom Omtoghintononi, kulet tagh kunet pich chïreryö, kinet ngala kipimat nko kisomönöt akïtat ngala ngötïnyö ompö tïnganat lasiny.

¹⁰Kiyar Omtoghintö ngal cho isunate akutenote, kikir nyinte ngala man.

¹¹Karkegh ngala pich cho ngöghomöch nko köröyö nyo ngatip, akïkarkegh ngala ngötïnyö cho kakituyö cho mwowu Mösöwontö akong nko chumaris cho kakïparta lö kïng.

¹²Mito kitö anka nyo orirunyi werïnyu. Möminye sörömu kikirata kitapun akwighinyi kisomönöto kitapun aghacha lönyïl.

¹³Ompö ngalechoni löwïr kelïmanyi, mi kïgh akonga nyo köngötï: Awagha Tororöt, anam kirurutkachi, ompöwölo nyoni nyo le kerötenyi kwighöy ptangengmöt.

¹⁴Ompöwölo ipu Tororöt kirwok ighisyö anka tïkwïl nyo wïnyate, ato kö karam anta kö gha.