Read pokoot TUM PÖ TUMWÖY 1 Bible Online

TUM PÖ TUMWÖY 1 - pokoot bible

TUM PÖ TUMWÖY 1

¹ Tum nyo pïchigh ompö tumwöy cho ngölono Solomon.

²Kelumanïn kutingu ompö chïchïnat, kaykay chomnyengu kïtïl dipay,*

³ngutoy nyo karam mwadangu nyo kiyiltoy, lenye kaynengu mwagh nyo kïmïlu, nka nyoni chöminyi tipïn.

⁴Nyonö mïtanïn kepïnö tïkwïl lawel, nya kumïtanïn pöytoghintö konyi wölnö rïwöy. Tökengörekyenöcha tïkwïl aketurönchï chomnyogh lasiny, akemeghyechï chomnyenyo, akanya kesala chomnyengu kïtïl dipay, owöy, mïchï kïchöminyi korï!

⁵Tipchï pö Yerusalem, ochan tuw nyoman, wölo ochan pïchigh. Alatan emeni Kedar, alatan pasyatina Solomon.

⁶Masasanïn ompö tuwïntönyan, ompöwölo kipelanïn asis, Könörekyanïn werköcha, akwighanïn chane ripinto pareni sapipun, Wölo melö kyoripön sapipunechan.

⁷Mwowante, we chamanenyu wölo oketïyi kechiryeku nko wölo wuro chane atay keghyö asis. Ompöwölo pö ne atampararan ayaratinyi ompö okwotino kechiryeko pörörisköku?

⁸Ato menkïtönyinye, we nyi nyo ichï pïchigh kïtïl kor löwïr, irïp kelyo kechir aterose wareku ompö emeni mösöw.

⁹Okongityoninyi, we chomnyenyu nko angoletino Parao cho ipöy nkaritin.

¹⁰Pïchighöch puteku nko sanay ato lumöy mötonyweku akïkarkegh nko sanay ato röytö katïngu.

¹¹Kiwucha nyi sïrïmnyonto koltin nyo kikïnöpchï kari silpa.

¹²Otini kitökïmi pöytoghintö kumungo ngacharenyi, kïwasta kegh ngutoghto ketïnyan nyo anyïn,

¹³karkegh chomnyenyan nko mïlot nyo pö mankoy cho ngutoy cho onyïn ato rïwöy nyinte kwenu kitichan.

¹⁴Karkegh chamanenyan nko tapïko pö wuw cho köngongisyö ompö pareto sapipunechan nyo mi Enkedi.

¹⁵Ichinyi pïchigh lö ne nya chamanenyu, ichinyi pïchigh akïkarkegh konyiku nko cho pö chepïrïm!

¹⁶Ichinyi pïchigh nyoman chamanenyu, opïrchininyi lö ne nya! Lïku suswö cho nyörilöch pöröyuncha.

¹⁷Lïku tarakit pïrompurisko konyo akïlïkwï saypras monchök.