Read pokoot TUM PÖ TUMWÖY 2 Bible Online

TUM PÖ TUMWÖY 2 - pokoot bible

TUM PÖ TUMWÖY 2

¹Ochan tapïka Syaron, tapïk nyo pito mpöghogh.

²Kïle wölo lata tapïk nyo karam ompö kwenu kato, kïlenye choni chamanenyan ompö kwenu möror.

³Le wölo lata ket pö mïrkïtwö ompö wuw, kïlenye nyoni chamanenyan ompö chumwak. Oturönan nyoman otini otöponan ngwïnyito rurwenyi akwonyïne akwechi ompö ani ochömchöman.

⁴Kimïtwanïn konyi nyo pö ichon, akïsyolö parakunyan penterenyi nyo pö chomnyogh.

⁵Tighante ompö rokï, chengenante pchïkïlïl ompö akwa mïrkut ompöwölo kakasan ompö chomnyogh.

⁶Opï kötïgh ewunyi nyo pö löt mötïnyan, akuwitanïn ewunyi nyo pö tagh.

⁷Omwante muma, tipichï pö Yerusalem, ompö chelopot anta kachey, lö molïtyinekwanye chomnyencha nyonikïny.

⁸Atere köny kutito chamanenyan! Anyinö nchölu kungïru kutïngkot, akïmi kukomonu kïröku kamas akïpusu.

⁹Karkegh chamanenyan nko kachey, lata wawa korinya. Anyinö ghyongo nayatuncha wölo le löt akurumuno tïrisyen, topönuno pïntö nyo yenote.

¹⁰Ngölonwanïn chamanenyan kïlenchinanïn, “Ngetunö nyu, chamanenyu, nyonö rïpkante,

¹¹ompöwölo sïwene lö kikuwer osiswo kaghïtan, akuwonyö osiswo rop.

¹²Körumunö tapïkoyï ngwïny, ketï osiswo tumwöy akemi kelïmo kutïwa chepïrïmpen korencha.

¹³Ketor makany kuyin, akïmi sapipun kïtopïkonöy akïwirï orösyon nyo anyïn. Ngeta nyu chamanenyu, nyonö rïpkante.

¹⁴Aso cheptukwenyu nyo kewïnga kegh karerpa ghat, nya asïwan tokochungu, aikany alïman kutingu, ompöwölo anyïn kutingu akïpïchigh tokochungu.

¹⁵Nömwecha chepkonöw, chepkonöw cho mïnkech cho nyoröy sapipunecha otini katapïkan sapipunecha.”

¹⁶Chamanenyan nyinte, achan nyenyi, yokwïyi kechiryechi wölo mi tapïkoyï,

¹⁷ntökïtenö kïröytö asis akïpechï kegh rurwonoyï Mïlena chamanenyu, lïkuna kachey anta wawa korinya ompö kutïng nyo mïkölköl.