Read pokoot TUM PÖ TUMWÖY 3 Bible Online

TUM PÖ TUMWÖY 3 - pokoot bible

TUM PÖ TUMWÖY 3

¹Kyanyaran oghö chi nyo kichömanïn mu, otini kyorïwan pöröyunyu, wölo kimonyorwanye. Olan okur, wölo melö kingitön nyinte.

²Olan, “Owetan ye oyörotoy nyinte, oghömunan kanasyan nko ortïn cho echön nko cho möriköch. Oyöran nyinte nyo le chamanenyan.” Kyasakasan nyinte, wölo kimonyorwanye.

³Kïnyorwanïn ripï cho kiwitwitöy kanasyan, atepan chane lö, “Kasïwekwa chomnyenyan?”

⁴Panini kyopesyan nko chane onyorwan chamanenyu. Anaman amelö kitopïstan ntökïtenö amïtwan nyinte koto yonyu, ntökïlït köyini kikïyichanïn.

⁵Omwante muma, tipichï pö Yerusalem, ompö chelopot anta kachey, lö molïtyinekwanye chomnyencha nyonikïny.

⁶Ne kitö nyinö pusuno surkwen, nyï karkegh nko pchöri ighöt nyo ngutoy mankoy cho kakïpel cho onyïn, pïsya pauden löwïr cho oltoy mïnchïrïs?

⁷Arose köny lö nyoni kï Solomon, nyo kïkösöno ngacharuto paytaghtanyi. Kiwit ripï kamasunyi, cho ngata tömönut mut nko akonga, chane kï nyakanpa Israel,

⁸akïtïng anka tïkwïl chokon, pich cho kile tïngon ompö poryot. Kingap chi anka tïkwïl ompö chane chokenyi, atökïporyeghö ato kïrir oghö.

⁹Kighchï kegh pöytoghintö Solomon ngacharu paytagh, kigha mpawtina keti Lepanon cho pïchighöch.

¹⁰Kigha kelyön cho kighyongo kari silpa akwigha patawunyi koltin, kïsïlö wölo kïtïpisot ananka nyo lata munyante akwa lamay, nyo kinap tipi Yerusalem ompö chomnyogh.

¹¹Ape we tipichï pö Sayon,* arosa pöytoghin Solomon, kïtïng kirawuni nyo kilokyï kame asisini kikensïyi, ato kiturönöy mïkulöwunyi.