Read pokoot TUM PÖ TUMWÖY 5 Bible Online

TUM PÖ TUMWÖY 5 - pokoot bible

TUM PÖ TUMWÖY 5

¹Kangwïnan parenyu cheptönyo, chamanenyu, oghömïtan mankoykachu cho ngutoy cho onyïn, oman tiyokachu nko kumate, agheghan dipaykachu* alï chekachu. Omisyenö chamankachu agheghsyö, ogheghsyenö chamankachu kïmïchï!

²Kyorïwön, wölo kichïkönöy mïkulöwunyan. Tere, anyona chamanenyan konykonyöy kukat. Yotwante kukat cheptönyo, we chamanenyu, cheptukwenyu nyo ichï tenate, ompöwölo kegh röyöntö mötïnyan kïnyarilit tïng putechan pkopïsyo nangat.

³Kyangwïsan sïrenyu kwompö ne talakan sïrenyu ngat? Kö kowunön kelyechu, kwompö ne tosïmnyonön ngat?

⁴Kukanagh chamanenyan ewunyi pïntö nyo mi kukat, kïturön mïkulöwunyan ompö orinyan.

⁵Angetan toyotyï chamanenyu kunyita manka manemane ompö ewunechan, kïchöyteghö morichan manemane cho kilïkwï pögh akïtökyï tömölöwonto kukat.

⁶Oyotyan chamanenyu wölo kichö mïla nyinte akïwechï kegh. Kïmeghanïn mu otini kimalïmanye kutinyi. Kyayaran nyinte, wölo kimonyorwanye, okurön, wölo melö kingitönwanïn.

⁷Kïnyorwanïn ripï cho kiwitwitöy kanasyan kïripsïyi, kïmunganïn chane kïpa kisön, akïsarenanïn sïrenyu nyo pö parak, pïchoni kiripöy kanasyan.

⁸Nyo omwante muma tipichï pö Yerusalem lö ato onyorukwa chamanenyan, omwochinekwa nyinte lö, ochan kasate ompö chomnyogh.

⁹Kïgh ne nyo wow nyo tïng chamanengu nyo tïlöy koru walaka cho le chaman? Pïchighyö ne nyo tïng chamanengu kïtïl koru walaka, tesaghechanyi le nyï nya?

¹⁰Sityö chamanenyan akï pïrir, rumuno nyinte mïrön cho makïrar

¹¹Karkegh mötïnye nko koltin cho pïchighöch, kipiririsyö putechi akï tuwöch le kukay.

¹²Karkegh konyichi nko cho pö cheptuken cho mi ato kosuno pögh, cheptuken cho mwöto kegh chö, akumpuruno wölo mi pögh cho rotöy.

¹³Karkegh mötongwechi nko paren cho kinyïghï tïkwïn cho ngutoy cho onyïn, akïkarkegh kutinyi nko tapïkoy cho tökuno mankoy pö manemane.

¹⁴Kilïmumisyö ewunechi le lïpö koltin cho kakïwayta sanay cho pïchighöch. Karkegh portanyi nko kela pelöw cho kakïmina koghïn cho pïchighöch.

¹⁵Karkegh kelyechi nko pchörino senkwet cho ghyongo wölo kikïteka koltin. Karkegh kïtontanyi nko Lepanon pïchigh le tarakit.

¹⁶Wechï onyïnech ngala cho pkono kutinyi achöman nyinte kïngeta kel ntökwit möt! Anyï nyu wölo lata chamanenyan akï kongenyan, akwa tipichï pö Yerusalem.