Read pokoot ISAYA 14 Bible Online

ISAYA 14 - pokoot bible

ISAYA 14

¹Tökusyonchini ECHOTYON pikachi Israel akïkïl chane ngat kïlïkwï pikachi kegh. Töni chane korengwa ngat. Pkonöy pikö walaka kïpïnchini koro Israel akïmang nko chane.

²Ngöroköy puntonï pipö Israel kïmïlisyö korengwa nyo kitö ECHOTYON. Pöghisyechini nyu puntonï Israel le sekeyikwa. Nömöy Israel pich cho kinam chane ato le tagh, akïpayta pich cho kichopöy kong chane atö kile tagh.

³Otini ketö ECHOTYON pipö Israel kimïny ompö kichopata kong nko nyarïltangwa nko sekeynönenkwa,

⁴ororöchikwa nyu pöytoghinto Papilon olentöy, “Kewonyö nyu pïröto pöytoghintonay tuw mu! Mökïtïngnye owesyö nyoni kïny.

⁵Keriy ECHOTYON lïkip pö pöytoghï cho le mwokïyis

⁶cho kimungo pich kïnomnyö ompö sïnyoryö, cho kipöytoy koros walaka ompö mïmïryö nko kichopata kong nyo möwïsönye.

⁷Mito kimungötö ngwïny kïmïkul, akïmi kalya, akïmi chi anka tïkwïl kïtumöy ompö ngörekyö.

⁸Ngörekyini saypras nko tarakit pö Lepanon pöytoghï cho kikuwonyö ompöwölo melö tökïmi chi nyo töröy ketichoni.

⁹“Karich kïtak ngwen pöytoghinto Papilon. Ngengetöy kïgh atoni mïkulis pö pich cho le mïntïruch cho kyowesöch ompö ngwïnyinï. Ngetsot mïkulis pö pöytoghï cho kimeghö ompö ngöcherwekwa cho pö paytagh.

¹⁰Yoku chane tïkwïl lö, ‘Kelïkunyi ye nyu tïkwïl chi nyo nyarkalal le acha! Kekaranyi kegh nko acha!

¹¹Kitïngönyi konyït ompö tumwöy cho kitumonyi pkurerun, wölo ye kikereyteghö konyïtöngu kïwö nyini le ngwen. Isïsïnenyi mök, aiyenenyi kegh nkut.’

¹²“Kechïnunenyi wölini le yïm, we pöytoghinto Papilon, nyi nyo ichï tapoghpa kiwasan! Kirïntenyi punton ato le tagh, wölo kakïwirtinyi otï le ye röytenö ngwïny.

¹³ Kilenyi ompö mïkulöwungu opustoy wölini le yïm atagh ngacharunyu nyo pö paytagh kïtörorit kïsir kokelyan anka tïkwïl nyo mi yïm. Kïlenchinenyi kegh otöpo kutïng pö tuyot, ompö koros cho lowöch cho pö okumpö löt.

¹⁴Kilenyi opustoy parak kïsir poltoy atekara kegh nko nyinte nyo Töror Tya.

¹⁵Wölo nyinö kitölïku nyoni, kewirtinyi röytenö wölini le ngwen.

¹⁶“Rosinyi pich cho kimeghö akïtopöninyi, akïtep kegh lö, ‘Akï chichete nyaye kitimtim ngwïny akwigh pöytoghï kïpotonchö nya?

¹⁷Akï nyinte nyanye kiwur kanastin akïwaghach kor kïlïkwï surkwen nya? Akï nyinte nyanye kitagh kutyak pich cho kirat kïpechï kegh kestonikwa?’

¹⁸Rusot ompö ororyö pöytoghi pipö punton, rïwöy chi anka tïkwïl pïrïmpenyi nyo pïchigh,

¹⁹wölo metïngetenyinye pïrïm, kïwirchininyi sany wölo lowö pïrïmpengu. Kïle monïng nyo kakityorunö muyeto kame, akï karkegh nko sïro pö pich cho kikepar, cho röytoy ntökwitïta ngwen kïle mïntïrïch nyo tïkotegho pich kelyön.

²⁰Metuyonyinye nko chane ato kïtïpisïyi, ompöwölo kingamanyi korengu, keparanyi piköku. Möminye chi akonga nyo ighöy ghöyityö nyo pö arenkwa nyo kituköy.

²¹Akanya ketowï pörchö! Meghsot werpö pöytoghintonete ompö parakuto ngokiko papotïnekwa. Möminye ompö chane nyo pöytoy ngwïnyinï kokay anta nyïghit kanastin.”

²²Lentöy ECHOTYON Kimuktoghin, “Oporyeghonan Papilon kuwonyö lökörpïs! Möminye kïgh nyo ngötu nyonikïny, melö ngötu monïngö nko kukötin. Mwoghöy ECHOTYON.

²³Owöghökan korononi kïlïkwï wölo möngöy chemasinchen akïlïkwï takaray, opuktenan korononi kïlowit ompö kopukyonto kiwurat.” Mwoghöy ECHOTYON Kimuktoghin.

²⁴ Kam ECHOTYON Kimuktoghin muma lö, “Igha kïgh anka tïkwïl nyo ononan nyo mötïny. Akwighöy kïyoni lenyini omöktonan ante.

²⁵Owuran pipö Asirya ompö koreto piköchan Israel, atïkatïkan chane kutïngkotichan cho mi korononi. Otyokan pikachu cho kirat pipö Asirya, atyaka chane nïkisïntin cho kikitö kïkasan.

²⁶Tötutyenyan nyoni ompö ngwïnyinï kïmïkul, aghïtonan ewunyu tökuchop kong pipö punton.”

²⁷Möchöy ECHOTYON Kimuktoghin kwighöy lenyoni, kakughïtö nyinte ewunyi atökuchop kong pungkachi, akï möminye chi nyo yodoy.

²⁸ Anyï ngölyon nyo kikipunï könyinini kirapas pöytoghintö Aas.

²⁹ Kakimïregh lïkïp nyo kïmungo pipö Pilisti, wölo mongörekyö. Ompöwölo ato ma moroya, kuchumu lötunyi mïnya nyo ngwan tya, ngwïno adösyonto moroy moroya nyo pilöy nyo karkegh nko ma.

³⁰Lïku ECHOTYON mösöwonteto pikachi cho le mey, akïrip chane kïtïpï ato tïghume. Wölo töni nyinte pipö Pilisti kömöy nyo ngwan, amelö pïsyini nyo le ompö akonga ompö chane kïsöp.

³¹Oteghenö ariryö akwa kanastina Pilisti! Omïghyenö, atyö akwane lömïs! Ompöwölo anyinö polta terïtyon kengwïna okumpö löt! Pipö lïk chane cho setu, amelö mi chi nyo körtoy.

³²Ekeyokyinecha ne pich cho yonu pipö Pilisti köny? Kïmwochinecha chane lö kakuchïchim ECHOTYON konyi nyo mi Sayon* akakutö pikachi cho kikirey kïryoghchï wöloni tïghume.