Read pokoot ISAYA 16 Bible Online

ISAYA 16 - pokoot bible

ISAYA 16

¹Kitötö pipö Moap wawa kech kïlïkwï ropöwon kïngeta kanasyanta Sela nyo mi surkwen, akïropchï pöytoghin nyo mi Sayon.*

²Köngisyegho chane sörömu lalwa Arnon, akïpestata wölnö nko wölnö le törit cho kakitulö panchengwa.

³Mito chane kïlenchini pipö Yuda, “Omwowecha kïgh nyo kighöy, akartecha le ket nyo yenöy pich rurwenyi atay keghyö asis, apïswecha kemungenö rurwenkwa. Kïchicha pich cho kïchï pïnot, owïnchecha wölo memukönye chi ntökïnyorwecha.

⁴Opïswecha kemanga korenkwa. Akartecha kechïwïtyeghenö pich cho mököy kuwonyecha.” (Itu ato melö tökepïröy pich anta kiwur, itu ato ngeto pich cho le rïmï ngwïnyinï.

⁵Atolapay nyu kegh chi akonga nyo pö ara Daudi kïlïkwï pöytoghin, atökïpayta pich ompö man nko chomnyogh. Ighöy nyinte kïgh nyo pö man lawel, akïsïwa lö kegha ngölyonto man.)

⁶Mito pipö Yuda kïlentöy, “Kakelïmacha wölo kwoltoy kegh pipö Moap. Kinkïtöcha lö menot chane, akïghechön mötöwöy akïköromöch, wölo menyiwunye kïgh köromnyengwa.”

⁷Riryot asïyech pipö Moap ompö nyarïl nyo nyoru. Riryot chane kïmïkul otini kenan omisyewut cho karamach cho kyomo chane kanasyanta Kirareset. Kitulöy chane akenor lasiny.

⁸Kiwuröy paren cho lekïto Espon lömïs nko keti sapipun cho pö Sipma ketichoni pö sapipun cho kitömesyeghö pöytoghi pipö punton dipaykakwa.* Kimi osiswe walaka ato kiyasta sapipunechoni ntökwit kanasyanta Yaser, akïtompöroryö kutang okumpö kongasis ntökwit surkwen, kïghïtö walaka okumpö ta ntökwit nanampa Paryan.

⁹Orirchinan ye sapipuno Sipma kïle ato orirchinan Yaser. Kötörengwanïn lok ompö Espon nko Eleale, ompöwölo mömicha pagh cho kïkösöy tökutö pich ngarakat.

¹⁰Puryö chi ye nyo ngarakate ompö paren cho okwoghöch, akï möminye chi nyo teghöy anta tum ompö pareni sapipun. Puryö chi nyo tïköy dipay ompö wölay kïpïro pögho sapipun atökegh kïlïkwï dipay. Kawangan kiteghsyo ngörekyo kasa.

¹¹Nka nyoni rirchini söpontönyan Moap atïngetan ngwonïn ompö Kireres.

¹²Kesus kegh kwïle pipö Moap lö kïlentöy kïpetöy tïkumwok, atökïsagha chane wölini tïlil, wölo menyiwunye kïgh ompö chane.

¹³Nka nyoni ngölyon nyo kangalana ECHOTYON paraku Moap ato le tagh.

¹⁴Mwoghöy ye nyu ECHOTYON lö, “Wonyot sïkönöto Moap nyo wow nyini ketïta könyiswö sömökï, akïngötu pikachi cho ngörï cho le nyasan.”