Read pokoot ISAYA 17 Bible Online

ISAYA 17 - pokoot bible

ISAYA 17

¹ Kïlö ECHOTYON, “Melö tökïlïku Damaska kanasyan ngat, lïku kitïkumön pö kïratyan.

²Kisuso kanastina Sirya kokay. Petöy kanastinechoni kïlïku wölo le acheyu kechir nko tïch, amelö mito chi nyo tulöy chane.

³Möminye wölo körtegho kegh pipö Israel, wonyegho paytagh Damaska. Nyoru arasï pipö Sirya cho le ngötunön le pipö Israel. Mwoghöy ECHOTYON Kimuktoghin.

⁴Itu asis akonga ato wonyegho owesyö pipö Israel, ato kïwöghököy mökosyenyi kïlïkwï meywontön.

⁵Körökegh pipö Israel osiswechoni nko par nyo le rorö, akïlïkwï kïratyan le par nyo mi mpöghoghyo Repaim otini kakïkas kïtïryalit.

⁶Körökegh atoni pipö Israel nko ket pö orolwö nyo kikepïtö akwechi lömïs kïpoto cho le odeny anta sömök cho köngötunö wölo le walisay. Ngötu chane cho ngörï lenyoni, anta karkegh nko cho ngörï cho köngötunö mori cho mi wölo porö.” Mwoghöy ECHOTYON, Tororöt pö Israel.

⁷Wöghökisyot pich ato itï asisoni wölo mi Ighintengwa, Tororöt pö Israel nyo Tïlil.

⁸Melö tökïtigho kegh ngat ato kïpelo amöros, cho kiteka chane morikwa cho le körkeyïntino tororöt Asyera* nyo le korka nko wölo töror kïpelo tïkwïn cho ngutoy nyo karam.

⁹Kisuro kanastin cho tïghume ato itï osiswechoni, le kanastina Ipiti nko cho pö Amori ato kipertegho chane pipö Israel.

¹⁰Kowutyeghekwa, pipö Israel, Tororöt nyo sörwokwa akïkartakwa le ghat nyo wow, apekwa akatkat ket atasagha tororötin cho sis.

¹¹Kïrkegh kaghya akïwirta tapïkay asiswanini kakatkatakwa, wölo monyorunekwanye pagh cho okösöy. Poto kömpölelyö nko nyarïl nyo ngwan.

¹²Ghumonu puntonï cho owesöch le kighumöto nanam, akïle mirtino pögh cho syolöy kegh.

¹³Ryoghöy pipö punton le mirtino pögh cho chang, wölo teghchini Tororöt chane atökïmïlonchö löt, akïyon le terïtyon nyo kïkutöy kïröytö kutïng, kïkarkegh nko mopö cho kutöy pïchpïchö,

¹⁴cho ato mi ato le nangat kwipï otyogh, wölo potyot otini kewas. Lenye nyoni wölo kidoy pich cho sörenecha tïkucho.