Read pokoot ISAYA 2 Bible Online

ISAYA 2 - pokoot bible

ISAYA 2

¹Anyï ngölyon nyo kitö Tororöt Isaya wero Amos nyo ngölono Yuda nko Yerusalem.

²Oghïghitu kutïng nyo ghyongo Kö pö Tororöt ompö osis cho pö löt akï koghitu kïsir walaka löwïr, akïtörorit kïsir kutïngkoti walaka cho mïnkech. Pkonöy asïyech pipö punton löwïr kïrotini,

³akïmi kïlentöy, “Apkana kepustena kutïng pö ECHOTYON, ntöketïta Kö pö Tororöt* pö Israel. Atökunetecha ortïnechi, atökepe kerïpa ortïn cho mököy kerïpacha. Ompöwölo pkono kinetut pö ECHOTYON Yerusalem, ngölonchini pikachi kïngetunö Sayon.”*

⁴Linyot koros cho ororöch, akïsat pich cho chang. Tongöy chokonikwa kïlïkwï mökompöy, akutang ngötwekwa kïlïkwï rotwoy cho kïköso pagh. Amelö tökïpöröy kegh ngat koroswö, amelö tökïsetöy ngat kokay.

⁵Apkana nyu pipö ara Yakopo, apkana kepeghena löpoyïn pö ECHOTYON!

⁶Kepakachtenyi piköku, we Tororöt, piköku cho pö ara Yakopo! Kinyïghï korengwa chepsoköytin cho kipkana Kongasis nko pipö Pilisti. Mito pich kïrïpöy otöptin cho sis.

⁷Kinyïghï kari silpa nko koltin korengwa, amöminye ato wonyot kaplawachtangwa. Kinyighï angoletinö korengwa, amöminye sörömu nkarinekwa.

⁸Kinyïghï ngat korengwa körkeyïntinö, soghöy chane ighisyewutko ewunekwa, tïkwïn cho kigha chane morikwa.

⁹Kimïnïngitöy nyu chi anka tïkwïl aketö arasï. Melöstoghchï chane ECHOTYON!

¹⁰ Wïnyo kegh chane kö pönot ompö wölnö le kutïngkot anta pal pïrïmpot lö tökechïwïtyenö ompö sïngiryo ECHOTYON atökïwïnga kegh wölo mi owesyenyi nko ororyenyi!

¹¹Itu asis ato wonyot menöto ptangengmöt, akewur kwolötenyi, ECHOTYON nyu onkït nyo kïsölöy asisoni.

¹²Ighöy ECHOTYON Kimuktoghin asisoni chi anka tïkwïl nyo awes kïmïnïngitu, chi anka tïkwïl nyo kwolöy kegh akï menotyon,

¹³wuröy tarakitpa Lepanon cho koghöch akï tororöt nko keti koro Pasyan tïkwïl.

¹⁴Poröy kutïngkot cho koghöch nko cho töngoghöch,

¹⁵nko tekat anka tïkwïl nyo kogh nyo kïripsyegho nko nïyet löwïr cho kïripsyegho,

¹⁶nko ompö melin tïkwïl cho pïchighöch tya cho kïchömöy cho pö Tarsis.

¹⁷Kiwongöy asisoni kwolöto chi, akewur menöto ptangengmöt: lïku nyu ECHOTYON onkït nyo kïsölöy asisoni,

¹⁸kiwongöy saghata körkeyïntin asisoni kokay.

¹⁹Pertoy pich nyu kïpetöy kïghïpcheghö köpönot anta pïrïmpot cho mi ngwïny kumukyï kïchïwïtyeghö sïnyoryo ECHOTYON nko owesyenyi nko ororyenyi nyo itu otini ngwïnöy nyinte kutimtimöy ngwïny.

²⁰Löstoy chane asisoni körkeyïntin cho pö koltin nko silpa cho kitang atökïsagh, kïlöstoghchini pungung nko reresoy.

²¹Ghïpchegho pich pïrïmpot nko kö pönot cho mi ghatoy atoni ngwïnöy ECHOTYON kutimtimöy ngwïny atökïchïwïtyeghö nörekyenyi, akïwïnya kegh wölo mi owesyenyi nko ororyenyi.

²²Motighö kegh ptangengmöt nyo mi kimïnytanyi sörunechi, ompöwölo kipïlilöy nyinte ompö kïgh ne?