Read pokoot ISAYA 21 Bible Online

ISAYA 21 - pokoot bible

ISAYA 21

¹Anyï ngölyon nyo ngölono Papilon. Ituno kiwurata kor nyo pö otyogh, nyo kikongityot nko wïwïchö nyo weru wölo le Surkwen.

²Kasïwan sïwïyagh nyo pö tïkwïn cho pö rïmö, sïwïyagh nyo kïwïchtoy kegh nko kiwurat. Kepokwï pipö Elam cho pö lïk akïporyö! Kusyep pipö Mede cho le setï kanastin! Wongöy Tororöt nyörilwok löwïr cho kepï pipö Papilon.

³Kinyïghitanïn otyogh nko ngwonïn ompö kïyoni kyasïwan alïm ompö sïwïyaghnoni. Ngwonïn nyo karkegh nko nyo pö korka nyo lusïyi.

⁴Kirotanïn möt, apotönöy ompö nyökoryö. Kyomitan opïrchini lö töröytö asis, wölo kimonyorwanye kingarakat nyonikïny kïpoto otyogh.

⁵Kyasïwan ompö sïwïyaghnoni, mesa nyo kikigh, akekarkar sakwïr cho tïpisot toyeko ichon. Omisïyi chane akïgheghsïyi. Akïtökïnyini lawel kwitï kut nyo lentöy, “Opisatinechï! Anapa longoykökwo!”

⁶Ompöwölo kïlenchanïn Echotyon, “Wïyö aitö ripin, aikany kïmwowï kïgh nyo sïwïyi?

⁷Ato sïwa pich cho pkono angoletin, akïpeghotegho odeny nko pikö walaka cho pkono sïkïröy nko tamasay, imwochï kuros lasiny.”

⁸Atolapay kutegh ripintonay lö, “We Echotyon, komitan oghyongo otini oripsegho pöghet nko nangat.”

⁹ Achï ketï yeteyi! Pkono chane angoletin cho peghotegho odeny odeny. Atolapay kïlö ripintonay, “Kakirultö Papilon! Kakïdïngodïng lömïs körkeyïntineko tororötinechi cho kösoghöy.”

¹⁰Akwa pikachu pipö Israel, kakïkatakwa le nkanun, wölo omwowokwa ye nyu lökoy cho karamach cho kalïman ECHOTYON Kimuktoghin, Tororöt pö Israel.

¹¹Anyï ngölyon nyo cheröy pipö Edom. Mi chi anïm nyo kuranïn ompö koro Edom, nyo tepsïyi lö, “Köngotï nyo tya tökïyech, nya ripintonï? Mwowante lö köngötï nyo tya tökuwas?”

¹²Oyokyan nyinte lö, “Itu yekonï, wölo melö nangatï ngat. Ato imököy tepe ngat, imïla aitep.”

¹³Anyï ngölyon nyo cheröy pipö Arapia ochech akwa pipö Dedan, cho orutoy apa amang surkwen pö Arapia,

¹⁴otönö pich pögh cho amate maral cho pkonöy wölo omitekwa. Ochech akwa pipö koro Tema, otönö pich cho le pïnot omisyö.

¹⁵Kepertoy pich kïchïwïtyeghö chokon cho mi kïpsach kuwany chane, akupertoy ompö kotï cho karich kïwut chane nko tapanpa poryot.

¹⁶Ompöwölo kilenchanïn Echotyon, “Wonyot wowïn pö pipö Kedar, otini ketïta köny akonga laras.

¹⁷Nyakan tya pipö Kedar cho wutïtoy kotï, wölo ngötu cho ngörï ompö chane ompöwölo ani ECHOTYON Tororöt pö Israel nyo kangalan.”