Read pokoot ISAYA 22 Bible Online

ISAYA 22 - pokoot bible

ISAYA 22

¹Anyï ngölyon nyo cheröy mpöghoghyo sïwïyagh. Ne nyo kegh? Kölö ne tökwomo pipö kanasyan kïmïkul ichontinekwa korïn parak anta pörköy?

²Kiteghyö piko kanasyan kïmïkul, akïpölyö kïmarikit akïsïch sirmoy nyo wow. Melö kimeghyö piköku cho kikïpara poryonete otini kimi poryot.

³Kipertoy löwïr kintöghoghiku, kenam chane kïtomö kïwutïtö kotöt ompö akonga.

⁴Nka nyoni omwoghan lö topönö wölona aipïstanïn orirchan pikachu cho kömeghö ompö ngonïn, mesusöy kegh lö osoghsoghanïn.

⁵Ompöwölo asispa nyarïl nyete, akï nyo pö rïntagh, akï nyo pö arata kegh ompö mpöghoghyo sïwïyagh, akï nyinte Echotyon, TORORÖT Kimuktoghin nyo köyonwecha. Kakirultö nïyetweko kanasyantencha, nka nyï kichögh rirata kïmarikit ompö kutïngkot.

⁶Kisetunö pipö lïk koro Elam cho kitïng kïwantis nko kotï. Kimi askarine walaka kïpsach nko longokökwa cho kipkono koro Kir.

⁷Kighömï lakas askarin cho kitïng ngarin mpöghoghöyi Yuda cho okwoghöch. Kighyongö askarin cho kipegho angoletin tawu ortïna Yerusalem.

⁸Kïrulyö nyu lömïs wölo kiripsyegho askarina Yuda. Nyini kigha lenyoni, iritunenyi kari lïk kö nyo mi wuw.

⁹Kïkany otini kyasïwekwa lö kinganga kanasyanta Daudi kïsarsarit, otököghökwa pögh cho kimi koto pögh nyo kimi wölo le to.

¹⁰Atolapay oyitökwa korïn lökïr cho kimi Yerusalem, anganyakwa kori walaka tonyorunö koghïn cho okïno nïyetwekwo kanasyantanoni. Akwompö wölo kyomökekwa onyorune pögh cho chang,

¹¹atekakwa kö pö pögh kanasyan ori nyo toköy pögh cho yinuno koto pögh nyo kipö könyisyok. Wölo melö kyayangakwa Tororöt nyo kitat könyisyok, akïsïwa lö kigha lenyoni.

¹²Kimi Echotyon, TORORÖT Kimuktoghin kïkurokwa asisoni lö oriryenö ateghyö ompö nyarïl, angwïl mötöwekwo alak sarankwachtin.

¹³ Wölo nyinö kitoghekwa lenyoni, opechikwa ororyö, aketa lö kïng! Kyayengakwa kechir apar tïch, amakwa pany, aghegh kumïn. Atolapay amwaghakwa lö, “Kyaketena akegheghsyö, ompöwölo kiwonyocha asïyech!”

¹⁴Kingölonwanïn ECHOTYON Kimuktoghin nyinte lö, “Melö kïlöstoghchini chane ghöyityengwa, otini kïnye tökïsöpsot chane.” Mwoghöy Echotyon TORORÖT Kimuktoghin.

¹⁵Kimwowanïn Echotyon, TORORÖT Kimuktoghin lö wïyö wölo mi Syepna nyo ripöy tïpö pöytoghin ailenchï,

¹⁶“Ilentenyi ochï ngo nya? Itïngetenyi man ne tewïyönyi pölchinö kegh pïrïm wölnö toka, aipölchï kegh wölo imöngöy ompö ghat?

¹⁷Töptoy ichinyi rumunote, wölo chenginyi ECHOTYON akïwirtinyi.

¹⁸Chenginyi nyinte le mpira akïwirchinyi kor nyo low. Imeghenyi ompö wöloni, otini lekïto piköku cho pö lïk, cho kekwolonyi kegh. Ketönönyi echotyontengu arasï.

¹⁹Yoninyi ECHOTYON ompö ighisyengu akuchoghchinyi ngwïny atengetena paytaghtangu.”

²⁰Atolapay kïlenchï ECHOTYON Syepna, “Nyini ketïta ngölyontononi, okurön mötworintenyu Elyakim wero Ilkia.

²¹Olokyinan nyinte sïrengu nyo pö paytagh nko angweto muyengu, atönön nyinte owesyö kïmïkul nyo ketïngetenyi. Kikongityot nyinte nko papo ompö pipö Yerusalem nko cho pö Yuda.

²² Otöninan owesyö nyo ompö paytagh nyo pö ara Daudi. Otöninan nyinte yotöwo paytagh. Yotöy nyinte, amöminye chi nyo köröy, akwotini kakar, möminye chi nyo yotöy.

²³Okichan nyinte lasiny le wudöwon nyo kïwudochini ato awes, akïlïku nyinte ngacharu ororyö ompö koto kwanta kïmïkul.

²⁴“Wölo lïku piko arengwa löwïr nko pikö walaka cho könyoruno kingarakat wölo mi nyinte nïkisïn ompö nyinte. Wïso chane nyinte le tören nko otupöy cho kakiwusö wudöwon!

²⁵Otini kegh ngölyontononi, kutyaka wudöwontonay kikïwudochï ato awes. Kïtöröy akïrul. Chïntoy nyu nïkisïn nyo kikiwusö parakunyi.” Mwoghöy ECHOTYON.