Read pokoot ISAYA 23 Bible Online

ISAYA 23 - pokoot bible

ISAYA 23

¹ Anyï ngölyon nyo cheröy Tiro. Oteghyenö ompö nyarïl pïchï opegho melino Tarsis! Ompöwölo kakiwur möngenkwa kïtuwit, möminye kö nyo köngötï anta wölo kïlïtöy. Kikïngongchï chane lökoyechoni otini kingetunö melinekwa koro Kupro.

²Osisyenö akwa mïnchïrïschï pö Sidon! Kayontekwa pich

³kwoghyö nanam tökwal akwalta pagh cho kirïrö koro Misri ataghana mïnchïrïsnön nko piko koroswe walaka.

⁴Itïngetenyi arasï, we kanasyanta Sidon! Ompöwölo kangalan nyini le nanam nko wölini le toyeto nanam akïlö, “Tomönye onyorwan ngwonïn pö lusyogh. Melö kyanaman monïng cho le wor anta tipïn.”

⁵Otyot pipö Misri akïtangany nyoman otini kalïm wölo kikiwurta Tiro.

⁶Oteghyenö ompö nyarïl pïchï pö Poinike! Omukyinö osurchinö koro Tarsis!

⁷Muko nyoman ntökïlïkwï kanasyantananye kimi ngörekyö, kipö Tiro nyanye kikïtek könyisyok nya? Nka nyete kanasyantananye kiyontoy pich kïpa kwoghyö antakwagh wölo low akïmöngisyö?

⁸Ngo nyini kitat tökïpkonchï ngalechï Tiro, nyanye kilokyini pich akopetin, akigho werpö pöytoghï orinyi mïnchïrïsnön, cho kitïng konyït nyo molu ompö ngwïny kïmïkulï?

⁹ECHOTYON Kimuktoghin nyo kitat. Kitat lenyoni atökuwur kwolöt nyo pö ororyö anka tïkwïl akutö arasï pipö ngwïny kïmïkul cho kïkonyïtöy.

¹⁰Ape ocholchinö pögh parenikwo, pich cho kyapa amang koro Tarsis! Tökïmi ngo nyu nyo körtonokwa ngat.

¹¹Keghïtö ECHOTYON ewunyi kwoghyö nanam akuryew pöyunötin. Kamwa nyinte ompö koro Poinike lö kiwuröy wölo tigho kegh chane.

¹²Kewonyegheninyi ngörekyö kanasyantanï pö Sidon, akemi kereyöy piköku. Kïrkegh kölentöy kisurchini koro Kupro, wölo möchïwïtyotcha.

¹³(Ki pipö Papilonia cho kiyotyï tyonkïn kuwur kanasyanta Tiro, melö pipö Asirya. Kitek teksyewut cho koghöch cho kïripsyegho akurultö nïyetwo Tiro akïpïstö kanasyante kïtïryalit.)

¹⁴Otyeghenö ompö nyarïl melino Tarsis! Kikewur kanasyantanay kotighokwa kegh.

¹⁵Itu asis akong ato kïwutyegho Tiro ompö könyis 70. Karkegh choni nko könyis cho söpöy pöytoghintö. Kikongityot Tiro otini kewonyö könyiswechoni nko korka nyo le chepores ompö tum nyo lentöy,

¹⁶Nama pïkantingu aiwestotö ighömï kanasyan, nyi meywontonï le chepores kikewutyeghenin! Pirönö aitum tumtöngu ngat tökwigh mïrön kïmïlisyö ngat.

¹⁷Kïkany kuwonyö könyiswechoni le 70, kuyokyï ECHOTYON Tiro mïnchïrïsnön nyo kipö tagh atökwolchï kegh paytaghtina ngwïny.

¹⁸Kïpöghisyegho ropïyenichoni löwïr könyorunö mïnchïrïsnön saghata ECHOTYON. Melö kituyot nko kaplawachtin, wölo pöghisyegho pich cho pöghisyechini ECHOTYON ropïyenichoni kwolo omisyewut cho chang nko sïro cho pïchighöch.