Read pokoot ISAYA 25 Bible Online

ISAYA 25 - pokoot bible

ISAYA 25

¹Ichinyi Tororötïnyan, we ECHOTYON, okonyïtinyi asal kaynatengu. Ompöwölo keghanyi tïkwïn cho pö töngönchin, kepuntenyi ompö man möchutköku cho kitatanyi könyisyok.

²Ompöwölo kewaghakanyi kanastin kïlïkwï kïratis aingany nïyetwekwa cho kigheto kegh. Keghanyi korïn cho kitek pungköcha kïpa löpoy.

³Konyïtinyi nyu pich cho owesöch, akewöghinyi kanastina pipö punton cho le pkatis.

⁴Köryöwï meyï nko pönon wölo imitenyi akïchïwïtyö chane ompö osiswo kömpölelut. Ikörteghonyi chane chepkiriri aitö rurwö nyo wuro ompö kilayat nyo ngwan, ompöwölo ngwan poryo pkatis le pïchpïch nyo ngongöy korïn,

⁵akïlenye kilayata kew. Wölo kekaranyi kong pungköcha, aikaranyi tumwöyi pkatis, le polta nyo körtoy asis nyo layate.

⁶Ighöy ECHOTYON Kimuktoghin akor ompö yete le kutïng pö Sayon* nyo omöy puntoni ngwïny kïmïkul. Kyomöy tïkwïn cho okwoghöch nyoman, akegheghöy dipay* cho pïchighöch kïmolï.

⁷Puktoy nyinte lawel ompö atoni polto nyarïl nyo körtoy pipö punton kïmïkul.

⁸Wuröy Echotyon TORORÖT Kimuktoghin meghat kokay! Miso nyinte lok konyi pich lapay, akïchenga arasï nyo kökikuwongunö pikachi ompö ngwïny kïmïkul. Ompöwölo ECHOTYON nyinte nyo kangalan.

⁹Mwoghöy chi anka tïkwïl ato itï asisoni lö, “Tororötïncha nyinte! Kikïmitecha kekönöy nyinte, kakïsörwecha nyinte. Nyinte kï ECHOTYON! Kikïmitecha kekönöy nyinte, akemitecha ye kengörekyot aketuronchot ompöwölo kösörwecha nyinte.”

¹⁰ Ompöwölo körtoy ECHOTYON kutïng pö Sayon, poto pipö Moap cho kïtïkyini ngwïny, kïle wölay kïtïköy ompö kïlïkwï pures.

¹¹Ghïtoy chane ewunekwa le pich cho pegho pögh, wölo optegho Tororöt kwolötengwa nko lïsat nyo pö ewunekwa.

¹²Wuröy nyinte nïyetwo Moap cho koghöch cho kökörtegho kegh kïrulchï ngwïny, akukorkorchï terïtyon parak.