Read pokoot ISAYA 26 Bible Online

ISAYA 26 - pokoot bible

ISAYA 26

¹Itu asis akonga ato tumo pich tum koro Yuda lö, Awes kanasyantencha! Tororöt nyinte nyo körtoy nïyetwechi!

²Ayata ortïna kanasyan, akany kïlït ori korö nyo ghanate, koronï ighöy pikachi man.

³Nyi, ECHOTYON nyo itöni kalya nyo tenate pich cho tïng machat nyo chïchïmate akïmi chane kughöninyi.

⁴Aghana ECHOTYON kokay, körtonecha nyinte kïtenö osis.

⁵Kemïnïngit nyinte pich cho kwolöy kegh, akïngany kanasyantengwa nyo oror akupurpur kïlïkwï terïtyon

⁶Mi ye nyu pich cho kikireyöy kïtïkotoy tïkotoy pönon nko mey kanasyantanoni.

⁷Ilïtitenyi ara pipö man, we Echotyon, rïpöy chane or nyo ghïteghote.

⁸Kïrïpecha kirurutköku, akekönecha nyi, nyi onkït nyo pïrchini mïkulisköcha.

⁹Pïrchininyi mïkulöwunyan oghö! Osökosinyi lasiny ompö söpontönyan. Ompöwölo ato mito kirwokutköku ngwïny, kunetöy kegh piko wöloni kwighöy man.

¹⁰Melö netöy kegh kïgh mwokïyis, kïrkegh keghchinyi chane nyo karam. Kïrkegh kömi chane koronete pö pich cho tenote, Kïtökwighöy chane tïkwïn cho kitosonchö, töghöy chane kïsïwïyi wölo ichinyi töror kïlïkwï.

¹¹Menkïtcha punköku lö imungenyi chane. Tönö chane arasï, we ECHOTYON aikany kuwongwï chane. Pïsyinö chane kuwongunö nyarïl nyo kitötyinyi chane aiporchï wölo ichömtonyi piköku.

¹²Ikonechanyi kalya, we ECHOTYON, ompöwölo löwïr cho kakighacha, kï nyi nyo kengarakecha.

¹³Heywey, we ECHOTYON Tororötïnyo! Kikïpaytecha pikö walaka, wölo nyi onkït nyo ichï ECHOTYONtencha.

¹⁴Kimeghö ye nyu chane amelö tökïsöpchot ngat, kikuwonyö chane melö tökïngetöy ompöwölo kenyarilanyi chane aiwur. Amelö tökunonöy chane kokay.

¹⁵Kitasanyi pipö punton, we ECHOTYON, aipörogh koroskökwa ainyorunyi ororyö.

¹⁶Kinyarilanyi piköku kong, we ECHOTYON kïsaghinyi chane otini kimi chane kiwongunöt.

¹⁷Nyi, we ECHOTYON nyo kighecha keriryenö le karka nyo tegho ngwonïn nyo pö lusyogh.

¹⁸Kikïkïghöcha kewongwï, wölo puryö monïng nyo kengwïn Tomönye kenyorunöcha rïntagh ompö korenyo, amelö mi kïgh nyo karam nyo kakighchicha ngwïny.

¹⁹ Söpsot ngat piköcha cho kikuwonyö! Tutuno porwoyikwa ngwen, akïtökïngetuno chane pïrïmpotikwa, atökïpka kïtum ompö ngörekyö. Töni ECHOTYON kimïny pich cho kimeghö könyisyok kïle wölo töntoy röyöntö ngwïny wïsöt.

²⁰Ape pikachu atanga korikwo, apa akar kukotwekwo. Awïnga kegh kite, ntökïtenö kuwonyö sïngiryo Tororöt.

²¹Ompöwölo ngwïno ECHOTYON möngenyi nyo mito yïm, atökunyaril kong pipö ngwïny ompö ngokikwa. Kiporu atoni irïmö nyo kikigha ngwïny ompö sison, amelö tökumuköy ngwïnya kïwïngöy pich cho kikïpörchï orinyi.