Read pokoot ISAYA 27 Bible Online

ISAYA 27 - pokoot bible

ISAYA 27

¹ Pöghisyegho ECHOTYON asisoni chokenyi nyo aghïgh akïwow akwawes atökunyarila kong tyompö pögh nyo kïkuro Lepiyatan, moroy nyo ryönöy kegh akïpar moroy nyo lichegho nanam ori.

²Ngölono nyu ECHOTYON asisoni parenyi nyo pïchigh pö sapipun lö,

³“Oripan parenyu, apïsö pögh kïnomnyö, kïnomnyö, arip nangat nko pöghet, atömengwïn chi kunyar.

⁴Melö tonörekyinan ngat pareto sapipunechu, kötö karam ntökömi kato nko takalaw, kötö oporyeghonan chane akötö opelan chane lömïs.

⁵Wölo ato mököy pungko piköchan oghetan, akany kwam chane mis nko ani. Owöy, akanya kwam chane mis nko ani.”

⁶Owesöchitu pipö Israel ompö osis cho pkonöy, tortoy nyighin asïyech pipö ara Yakopo, akïtapïkan, kïkarkegh nko ket nyo pitöy. Ghömu ngwïny kïmïkul akwa cho yinu chane.

⁷Tomönye kuchop kong ECHOTYON pipö Israel tya le wölo kida pungkökwa, amelö kipar nyinte pikökwa cho teno cho pö pungkökwa.

⁸Kichop kong ECHOTYON pikachi otini kiranga chane korengwa akwigh kïlïkwï pïnot. Kiranga chane yomat nyo ngwan nyo kikutuna kongasis.

⁹Wölo kïlöstoghchini pipö Israel ngokikwa otini kewany chane kïngagh koghi tïsöwo pipö punton kïkarkegh nko pïsya amelö tökïmi ngat koghïn cho ngötu cho kïpelo tïsöw anta körkeyïntin cho pö tororötnay le karka kïkuro Asyera.*

¹⁰Ompöwölo lïku, kïratyan kanasyantanay awes kikïtek atökeripsyeghö. Kiwaghaka atoni kïlïkwï acheyu kyak nyo munyo akwaketegha.

¹¹Silonchot mori ket akïmïrisyö, atolapay kïghamït korï kïlïkwï kwenkakwa. Akwompöwölo melö kisïkwï pich kïgh, kïtagh Ighintengwa Tororöt kusyonchï chane.

¹²Ghömïtöy ECHOTYON aisoni pikachi kwakonga akonga kïle chi nyo seröy pagh nko morïr, kïngetunö Yuparet ntökwit sörömu Misri.

¹³Kïkutöy kontï otini ketï asisoni nyo kuruno pich koro Asirya nko nyo pö Misri pipö Israel cho kipïnchï koroswechoni. Mïlonchot chane akïpka kïsagha ECHOTYON kanasyanta Yerusalem, kutïngtanyi nyo tïlil.