Read pokoot ISAYA 29 Bible Online

ISAYA 29 - pokoot bible

ISAYA 29

¹Heywey! Ochech wölo kawïrta ato kïpelo amöros pö Tororöt nyo mi Yerusalem, kanasyan nyo kimöngöy Daudi. Kanya kuwer könyï akong anta odeny nko akortinechi cho pkonöy akuweröy,

²atökwipchï Tororöt nyarïl kanasyantanoni kïkuro, “Ato kïpelo amöros pö Tororöt.” Lïku nyu rira nko kiriköt, atökekongityö kanasyante kïmïkul nko ato kïpelo amöros nyo kilum kisön.

³Poryegho Tororöt kanasyantanoni akuwitwit akusyep.

⁴Kikongityot Yerusalem nko mïkulögh nyo churyot akïmi kïngölonuno oripö ngwïny, kut nyo chumuno terïtyon.

⁵Kïkutïtoy pipö punton löwïr cho poryegheninyi, we Yerusalem le terïtyon, atökupiltoy le mopö panini lawel pikökwa cho pö lïk cho otyegho pich.

⁶Sörunyi ECHOTYON Kimuktoghin ompö tïlöto ilat nko potanata ngwïny nko chöghöt nyo wow nko chepkiriri nko lyopöto ma nyo wuröy kor.

⁷Kikongityot nyu atoni söpïchis pö lïkoni punton kïmïkul, kïmi nko korikwa cho poryegho lömïs nko nïyetwekwa cho kikïtek cho körtegho kegh nko pich löwïr cho wököy nyinte, kikongityot chane tïkwïl nko kirwotïtogh nyo kïsïwïyi oghökwen ompö rïwön.

⁸Kikongityot atoni punton kïmïkul cho tuyot atökïporyeghö Sayon* nko chi nyo sutate nyo rwotïtoy lö omitö omisïyi, nyo otini kotyö kïlö olö omitö nko kömöy, anta kikongityö nko chi nyo kima nko maral, nyo rwotïtoy lö omitö ogheghöy pögh, nyo otini kotyö kïlö olö kiyaman sïghiny!

⁹Aleta tagh alïkuna sölwöy! Aleta tagh oköryenö! Otömesyenö akï puryö kumïn cho kaghegh! Okwongkwongisyenö kïrkegh machamcham cho le tïkwïte!

¹⁰Keghakwa ECHOTYON onukyenö atoruyenö rïwön nyo nïkis. Werkoy cho kötö lïku konyi pich, wölo kelum Tororöt konyikwa.

¹¹Kïwïngo chane ngölyon anka tïkwïl nyo pö werkoynön. Kikongityot ngölyontononi nko kikirut cho kikïkar lasinchïch ompö chane, nyo ato ipchinyi chi nyo kikusomön aitepanyi kusomönunyi, kïlenchinyi momukanye ompöwölo kikekar lasinchïch.

¹²Kïkany ato ipchinyi chi nyo menkïtnye kusomönöy ailenchinyi, somönwante, kïlenchinyi melö onkïtön wölo kisomöntoy.

¹³ Kïlö Echotyon, “Lentöy pïchï kïsoghanïn, wölo melö tïng kinyiwut ngalekwa, ompöwölo lowöch mïkuliskökwa. Tigho kegh chane dini nyo rïpöy kinetut pö pich nko otöptinekwa cho kenet kegh akelimlim.

¹⁴Kïlenyona nyu, oghan ighisyö nyo kïtöngönchini ompö kwenu pïchï, ighisyö nyo kïtöngönchini akewöghisyö. Lïku cho ngöghomöch ompö chane sölwöy, akïwaghaka chïreryengwa kïlïkwï kwïle.”

¹⁵Heywey! Ochech pich cho mukyini lö kïwïnyo ECHOTYON tötutkökwa! Mito chane tuwïn, akunonöy lö möminye chi nyo sïwïyi chane anta sïwa kïgh nyo ighöy chane.

¹⁶ Wöghököy chane kïgh anka tïkwïl kïchumpön. Akupim kïsïkwï lö ekïngo köny nyo pïchigh tya, ighinto tör nya anta mönö? Muköy so kïgh nyo kegh chi, kïlenchini chichini kigh, “Melö kighaninyi?” Ante lenchï, “Melö inkïtönyi kïgh nyo ighöy?”

¹⁷Kïle wölo kikemwa lö lïku wuw nyo kinagh ketï kïtuwit wölo kïngoröy paren, akïwaghaka ngat wölay kakïngoröy paren kïlïkwï wuw nyo nöghöy ketï kïtuwit.

¹⁸Ato itï asisoni, kumï nyu chi nyo mingate kïlïm ngal cho kisomönuno kitapï, akïyotisyö konyi chepkarotin, cho kimöngöy wölo tuw akurosïta.

¹⁹Tösöy ngörekyengwa pich cho tölose nko cho le mey nyo töni ECHOTYON Tororöt pö Israel nyo Tïlil.

²⁰Lïku nyu atoni kiwonyö ompö pich cho wököy pikö walaka akïsas Tororöt. Kiwuröy mwokïyon anka tïkwïl.

²¹Wuröy Tororöt pich löwïr cho mïrchini pikö walaka put, chane cho körtoy lelï tömönyorï mantangwa nko chane cho mïröy putintön atökïkarta pipö man tömönyorï mantangwa.

²²Kïlenyona, lentöy ye nyu ECHOTYON Tororöt pö Israel nyo kisörunö Apraam nyarïl, “Melö tökïnyoru piköchan ngat arasï, melö tökworusöchitu ngat tokochwekwa ompö arasï.

²³Ompöwölo otini kasïwekwa monïng cho okonokwa, onkïtukwa nyu lö ochan Tororöt pö Israel nyo Tïlil. Okonyïtanïkwa, atïlil kaynatenyan.

²⁴Netöy kegh pich kïsïku kïgh cho kitosonchö mïkuliskökwa, akïtach kinetut pich cho ngwïrngwïronöy kïtenö osis.”